Almatyda týrıstik aqparattyq ortalyq ashyldy

Qala ákimi Baýyrjan Baıbek qalaǵa kelgen árbir sheteldik qonaqtyń kórikti jerler, mádenı oqıǵalar, meımanhanalar týraly bir tereze prınsıpi boıynsha tolyq málimetti qalaı alatyndyǵymen tanysty.

Qalanyń Týrızm jáne syrtqy baılanystar basqarmasynyń basshysy Erlan Jaılaýbaı vızıt ortalyqtyń Almaty turǵyndary men qonaqtaryna megaolıstiń týrıstik áleýeti týraly kásibı keńes, jol kartalary men taý baǵyttarynyń atlastaryn, týroperatorlar broshıýralaryn, mádenı- buqaralyq sharalardyń anonstaryn beretindigin, ekskýrsııaǵa, sývenır buıymdarǵa tapsyrys alýǵa, eń bastysy týrıster úshin mobıldi baılanys operatorynyń SIM-kartasyn beıimdeýge bolatyndyǵyn aıta kele, qazirgi kezde barynsha tanymal lokasııalarda aqparattyq týrıstik kıoskiler ashý máselesi qarastyrylyp jatqanyna toqtaldy. Basqarma basshysy mundaı ortalyqty ashý Parıj, London, Dýbaı, Nıý-Iork, Barselona sııaqty týrızm salasy damyǵan qalalar tájirıbesinen alynǵandyǵyn jetkizdi.

«Qazirdiń ózinde www.visitalmaty.kz resmı saıty jumys isteýde, keıin ol jeti tildi qamtıtyn bolady. Saıtta qalanyń tanymal kórneki  oryndary, ulttyq mázir daıyndaıtyn meıramhanalary, oqıǵalalar tizbegi týraly tolyq aqparattar jarııalanady.Vızıt ortalyqta keńes berý, sývenır, sóılesý, túrli sharalar ótkizýdiń ınteraktıvti  aımaqtary qamtamasyz etilgen. Tehnıkalyq turǵyda ashylǵaly beri 109 týrıst habarlasty», – degen ortalyq dırektory Ásel Núrkebaeva saıahatshylar úshin tótenshe jaǵdaı týyndaı qalsa túrli máseleni jedel sheshetin shuǵyl jeli qurylǵanyn da atap ótti.

Aıta ketsek, «Almatynyń vızıt ortalyǵyn» bolashaqta memlekettik-jekeshelik áriptestiktiń katalızatoryna jáne Almaty klasteriniń týrıstik developmentine aınaldyrý josparlanǵan. Halyqaralyq naryqta týrıstik áleýetti kórsetý jobalaryn júzege asyrý, óńirdiń reıtıngi men básekege qabilettiligine taldaý jasaý, týrızmdi damytý múmkindikterin izdestirý, osy salada túrli zertteýler júrgizý týrıstik aqparattyq ortalyq jumysynyń basty bóligi bolady.

Mıra Baıbek,

«Egemen Qazaqstan»

ALMATY