Búgingi tańda Ońtústik Qazaqstan, Almaty, Jambyl, Qyzylorda, Mańǵystaý sııaqty jumys kúshi artyq oblystardan Shyǵys Qazaqstan, Soltústik Qazaqstan, Pavlodar, Qostanaı syndy eńbek qoly tapshy óńirlerge 1324 adam qonys aýdardy. Bul týraly QR Eńbek jáne halyqty áleýmettik qorǵaý mınıstrliginiń baspasóz qyzmeti habarlady.
Osylaısha, jumys izdegen 335 otbasy ońtústik ólkelerden soltústik aımaqtarǵa erikti túrde kósh túzedi. Eńbek jáne halyqty áleýmettik qorǵaý mınıstrligi baspasóz qyzmetiniń aqparaty boıynsha, jańa mekenge qonystanǵan eńbekke qabiletti azamattar turaqty jumys oryndaryna turǵyzylady.
Erikti kóshti qoldaýǵa arnalǵan memleket kómegine otbasynyń ár múshesine arnalǵan 35 aılyq eseptik kórsetkish kólemindegi kóshi-qon sýbsıdııasy, bir jyl júzinde aı saıyn beriletin 15-30 aılyq eseptik kórsetkish sıpatyndaǵy baspana jaldaý men kommýnaldyq qyzmetterdi tóleý qarjysy kiredi.
Eske sala ketsek, Nátıjeli jumyspen qamtýdy jáne jappaı kásipkerlikti damytý baǵdarlamasy aıasynda eńbek resýrstarynyń utqyrlyǵyn arttyrý maqsatynda, Úkimet kósh shyǵatyn jáne ony qabyldaıtyn óńirlerdi, qonys aýdarýshylardy qoldaýǵa qajet áleýmettik kómek túrlerin anyqtady.
Kósh erikti túrde jáne mindetti túrde jumys berýshi tarapta bos jumys oryndary bolǵanda ǵana qolǵa alynady. Osy oraıda, kóshti qabyldaıtyn jaq halyqty jumyspen qamtý ortalyǵyna qandaı mamandyqtar jóninde qosymsha eńbek kúshi kerektigin, qoıylatyn talaptar men sharttar týraly aqparatty jetkizýi tıis. Belgili bir biliktiligi joq qonys aýdarýshy azamattarǵa qysqa merzimdi oqýdan ótip, jumysshy mamandyqty meńgerýge múmkindik qamtamasyz etiledi.
Baǵdarlamanyń atalǵan baǵytyn júzege asyrý arqyly eńbek resýrstarynyń qozǵalysy jandanyp, azamattardyń ekonomıka suranysyna saı utymdy ornalasýy qamtamasyz etiledi.