«Astana» komandasynyń bas bapkeri Stanımır Stoılov Izraıldiń «Makkabı» klýbyna qarsy oıyn aldynda ujymnyń daıyndyǵy týraly oı bólisti.
- Erteń bizdi kezekti fýtbol merekesi kútip tur. Biz joǵary deńgeıde óner kórsetip, jaqsy nátıjege qol jetkizemiz dep oılaımyn. «Makkabı» sońǵy jyldary ózin jaqsy qyrynan kórsetip keledi. Ásirese, Jordı Kroıff kelgeli qarqynyn kúsheıtti. Alaıda, biz óz oıynymyzǵa kóńil bólýimiz kerek. Sebebi, jankúıerlerimizdiń aldynda óner kórsetemiz. Olardyń qoldaýy bizge qosymsha kúsh beredi.
- «Makkabıge» qarsy eki oıyndy toptyq kezeńdegi mańyzdy matchtar retinde qarastyrýǵa bola ma? Eki kezdesýdiń nátıjesi toptyq kezeńge qanshalyqty áser etedi?
- Negizi sizdiń pikirińizben kelisýge bolady. Biz jeńiske jetýdi maqsat etýimiz kerek. Jankúıerlerimizdi qýantý úshin qolymyzdan kelgenniń bárin jasaımyz. Eger toptyq kezeńnen óte alsaq, bul bizdiń deńgeıimizdiń kóterilgeniniń belgisi.
- «Ertiske» qarsy oıynda komanda sharshańqylaý kórindi. Ekinshi taımda deńgeıiniń joǵarylyǵynyń arqasynda jeńiske jetti dep te aıtýǵa bolady. Oıynshylar búginge deıin óz qalyptaryna kelip úlgerdi me?
- Eger toǵyz aıdan keıin komandanyń daıyndyǵy nashar deıtin bolsaq, biz birnárseden múlt ketken sııaqtymyz. Jigitterdiń árbir ýaqyty esepteýli ekeni túsinikti. Alaıda, biz bárine saqadaı saı bolýymyz kerek.
- Komandada qandaı da bir qıyndyqtar bar ma?
- Ujymda jaraqat máselesine qatysty azdaǵan qıyndyqtar bar. Máselen, Djordje Despotovıch pen Laslo Klıaınhaısler emdelip jatyr. Srdjan Graovas óz qalpyna áli kelmedi. Jattyǵyp júr. Marın Anıchıchtiń de jaǵdaıy sondaı. Fýtbol bolǵannan keıin ózindik qıyndyqtary da bar. Biraq biz bul tyǵyryqtan shyǵý joldaryn qarastyrýymyz kerek.
- Mýjıkov erteń alańǵa shyǵa ala ma?
Ras, Mýjıkovqa emdelý kerek. Biraq bul jaraqatyn chempıonattaǵy úziliste emdeıtin bolady. Ishki birinshilik aıaqtalǵanǵa deıin ol múmkindiginshe kóbirek alańǵa shyǵýǵa tyrysady. Qazir basty másele, Serikjan 12 kún boıy jattyqpady. Alaıda, erteńgi oıynda komandaǵa kómektesý úshin baryn salýy kerek. Mýjıkov áriptesteri sekildi ylǵı da joǵary deńgeıde óner kórsetýge daıyn ekenin jaqsy bilemin.
- Sizge Túrkııa chempıonatyndaǵy komandalardyń qyzyǵýshylyq tanytyp otyr...
- Qazir oıymyzdyń bári «Makkabıge» qarsy match jaıly. Al qalǵan máselelerdi keıinirek qarastyratyn bolamyz. Usynys tússe qarastyrýǵa daıynbyz.
- Bul kezdesýde «Astanany» favorıt retinde qarastyrýǵa bola ma?
- «Astana» ózin eýropalyq komandalarǵa qarsy oıynda favorıt retinde sezine almaıdy. О́z múmkindigimizdi shekten tys asyrmalaýǵa bolmaıdy. Eger biz sońǵy úsh jylda Eýropada óner kórsetip júrgen bolsaq, ózimizdi «Realdyń» deńgeıine qoıa almaımyz. Alaıda, fýtbolda eshqashan favorıt komanda jeńiske jete bermeıdi degen pikirimnen aınyǵan emespin. Eger mundaı kezdesýlerde ózimizdi favorıt retinde qarastyrǵymyz kelse kóbirek qarjy bólinýi kerek.
Aıan ÁBDÝÁLI, «Egemen Qazaqstan»