«Makkabı» komandasynyń bas bapkeri Jordı Kroıff Eýropa lıgasynyń toptyq kezeńinde «Astanaǵa» qarsy oıyn aldynda pikir bildirdi.
- «Makkabıdiń» jeńiske jetý múmkinshiligi qanshalyqty joǵary?
- Qıyn ekeni belgili. «Astana» óz alańynda ásirese eýropalyq oıyndarda eshkimge ese jibermeıdi. Onyń ústine alań da jasandy. Bul qarsylastarymyzǵa septigin tıgizeri anyq.
- Siz oıynshy retinde ǵumyryńyzdy aıaqtaǵannan keıin fýtbolǵa qatysty barlyq salada jumys istedińiz. О́zińizge yńǵaıly naqty bir salaǵa toqtaldyńyz ba?
- Men eń bastysy fýtboldy jaqsy kóremin. Bolashaqta ne bolaryn bilmeıin. Bárin ýaqyt kórsetedi.
- Siz jaıly Stanımır Stoılov jyly lebizderin bildirdi. Al siz áriptesińiz týraly qandaı pikirde bildiresiz?
- Men onymen syılaspyn. Osydan bes-alty jyl buryn ekeýimiz Kıprde tanystyq. Men ony adam retinde de, maman retinde de qatty syılaımyn. Aldaǵy ýaqytta áriptesime tek sáttilik tileımin biraq erteńgi oıynda emes.
- Sizdiń komandańyz ótken jyly «Qaıratpen» oınady. Endi «Astana». Qaı klýb myqty dep oılaısyz?
- Eger Qazaqstan chempıonatyn alar bolsaq, «Astana» chempıon. Bul óz kezeginde kimniń myqty ekenin aıtyp tur. Al «Qaıratqa» qarsy oıynda óz babymyzda emes edik. Jeńiske jetip, ary qaraı ótkenimizge qýanamyn. Al «Astanaǵa» keler bolsaq, bul jerde jaǵdaı múldem basqasha.
- Siz áıgili Iohan Kroıfftyń ulysyz. Ákeńizdiń fılosofııasyn ózińizge sińire aldyńyz ba?
- Ákem bapker retinde de, oıynshy retinde de úlken jetistikterge jetken. Aty ańyzǵa aınalǵan tulǵa. Biraq meni ol kisimen salystyrmaǵan jón.
- «Astanada» birneshe oıynshy jaraqat alyp qaldy. Bul óz kezeginde «Makkabıge» septigin tıgize me?
- Bizde de jaraqat alǵan oıynshylar bar. Sondyqtan jaǵdaıymyz birdeı dep oılaımyn.
- Qansha oıynshy jaraqat alyp qaldy?
- Tel Avıvte alty-jeti mańyzdy oıynshymyzdy qaldyryp kettik.
- Toptaǵy komandalardyń ishinde qaı ujymnyń pleı-offqa shyǵý múmkindigi joǵary?
- Toptaǵy tórt komanda da jeńiske jetý úshin baryn salady. Árıne aramyzda «Vılıarrealdyń» favorıt ekeni túsinikti. Al qalǵan úsh komanda ózara myqtyny anyqtap, upaı bólisedi. Bári toptan shyǵý úshin aıanyp qalmaıdy.
Aıan ÁBDÝÁLI, «Egemen Qazaqstan»