Búgin Eńbek jáne halyqty áleýmettik qorǵaý mınıstri Tamara Dúısenova, Almaty qalasyna jumys sapary barysynda «Almaty kópir qurylysy» JShS eńbek ujymymen kezdesti.
Kezdesý barysynda Eńbek kodeksi men ujymdyq eńbek shartyn sapaly júzege asyrý, kásipodaq qozǵalysyndaǵy áleýmettik áriptestikti damytý máseleleri sóz boldy. Almaty qalasyndaǵy Halyqty jumyspen qamtý ortalyǵynda bolǵan Tamara Dúısenova, Ortalyqtyń jańǵyrtý aldyndaǵy jumysymen tanysty.
Beıimdeý jáne ońaltý ortalyǵyndaǵy «Keńes» múgedekter qoǵamdyq birlestigi Eńbek jáne halyqty áleýmettik qorǵaý mınıstrine «Balalar densaýlyǵy damýynyń buzylýyna erte aralasý – sábılerdiń aýyr múgedektigi men erte jetim qalýynyń aldyn alýdyń kepili» atty qanatqaqty jobany tanystyrdy.
Qanatqaqty jobany synaqtyq júzege asyrý barysynda tárbıesindegi bala damýynda ereksheligi bar 520 otbasy maman keńesin alyp úlgerdi. Ortalyq mamandarynyń boljamy boıynsha, jobaǵa qatysqan balalardyń 70%-dan astamy, bolashaqta balalar baqshasy men jalpy bilim beretin mektepterdegi qalypty ortaǵa aralasyp ketýge tolyq daıyn bolady.
«Keńes» ortalyǵy psıhonevrologııalyq aýytqýy bar balalar men olardyń otbasylarynyń quqyqtary men múddelerin qorǵaýǵa baǵyttalǵan áleýmettik jobalar men baǵdarlamalardyń damýyna eleýli úles qosyp keledi. Tamara Dúısenova ortalyqtyń jumys nátıjesine oń baǵasyn berip, elimizdiń ózge de óńirlerinde dál osyndaı ortalyqtardy ashýdyń mańyzdylyǵyna toqtaldy.
Sonymen qatar, jumys sapary barysynda, Almaty qalasynyń ákimi B.Baıbektiń qatysýymen áleýmettik-eńbek salasynyń máseleleri boıynsha jıyn ótti. О́z sózinde T.Dúısenova mınıstrliktiń áleýmettik-eńbek salasyn jańǵyrtý barysyndaǵy jumys nátıjeleri jaıly áńgimeledi.
Esterińizge sala keteıik, 2018 jyldyń 1 qańtarynan bastap, Elbasynyń «Ult jospary – 100 naqty qadam» ıdeıasy men halyqqa Joldaýynan týyndaıtyn tapsyrmalardy júzege asyrý maqsatynda áleýmettik-eńbek salasyn jańǵyrtýǵa baǵyttalǵan keshendi sharalar júzege asady.
Mınıstr búgingi tańdaǵy eń basym baǵyttyń biri – az qamtylǵan otbasylarǵa shartsyz jáne shartty túrde beriletin jańa sıpattaǵy ataýly áleýmettik kómektiń engizilýi ekenine nazar aýdardy.
Eger qazirgi tańda AÁK (ataýly áleýmettik kómek) tabysy kúnkóris deńgeıinen 40% tómen adamdar men otbasylarǵa qarjylaı kómek retinde beriletin bolsa, jańa jyldan bastap AÁK áleýmettik kelisimshart jasasqan jaǵdaıda beriletin bolady.
Sonymen birge, jańa jyldan bastap tólenetin AÁK - qazirgi tańdaǵy AÁK, balalar járdemaqysy jáne arnaıy memlekettik járdemaqy sekildi 3 áleýmettik tólemniń ornyna Biryńǵaı járdemaqy túrinde tólenetin bolady. Eń basty eskeretin jaıt, jańa AÁK mólsheri joǵaryda atalǵan 3 túrli járdemaqynyń jalpy somasynan joǵary bolady.
«Sondyqtan, jańa AÁK tek qana qarjylaı járdemaqy ǵana emes, kedeılik deńgeıinen shyǵýdyń keshendi sharasy bolmaq. Járdemaqynyń qoljetimdiligi men bıznes-prosesterdi ońtaılandyrý maqsatynda járdemaqyny bir tereze júıesimen Jumyspen qamtý ortalyqtary arqyly júrgizý usynylady», - dedi Mınıstr.
Mınıstr alda turǵan maqsattardy eskere otyryp, jumyspen qamtý ortalyqtaryn kúsheıtý arqyly jumyspen qamtý men áleýmettik baǵdarlamalar bólimderinde qosymsha jumys oryndaryn ashyp, materıaldyq-tehnıkalyq jabdyqtalýy men maman daıarlaý isine asa mán berý kerek ekenin atap ótti.