Elimizdegi eń iri jylyjaı kesheni osy jyldyń jarty jylynda 4 myń tonnaǵa jýyq ónim aldy, dep habarlady OQO ákiminiń baspasóz qyzmeti.
Gektaryna 300-350 sentnerden ónim alyp otyrǵan «Adelıa» jylyjaıy 16 gektar jerge qyzynaq pen qııar egip, jylyna eki ret ónim alyp otyr. Ordabasy aýdany, Badam aýylynda ornalasqan jylyjaı qojalyǵynyń jumysymen BAQ ókilderi men blogerler aýqymy keń jumystyń qyr-syrymen tanysyp qaıtty.
Jylyjaıda fransýz kompanııasynyń zamanaýı qondyrǵylary ornatylǵan. Munda jylytýdan bastap tamshylatyp sýarýǵa deıingi barlyq prosess kompıýtermen baqylanady.
Kásipkerdiń aıtýynsha, mundaǵy ósiriletin kókónister ekologııalyq taza ónim. Olardy ósirýde qoldanylatyn tehnologııa sý men tyńaıtqyshtardy jáne basqa da resýrstardy únemdeýge múmkindik beredi. Al jobanyń ózi elimizdiń eksporttyq áleýetin arttyrýǵa múmkindigi mol. Jınalǵan ónimniń basym bóligi Reseıge eksporttalsa, qalǵany Qazaqstannyń Almaty, Astana qalalaryna jiberiledi.
Indýstrıalandyrý kartasy aıasynda iske asqan bul jobany «QazAgroQarjy» aksıonerlik qoǵamy qarjylandyrǵan. Atalmysh uıym 2011 jyly 440 mıllıon teńge kóleminde jeńildetilgen nesıe berse, 2013 jyly 2,2 mıllıard teńge kóleminde qarjy bólgen.
Jalpy oblys aýmaǵyndaǵy jylyjaıdyń jalpy kólemi 900 gektardan asady. Bul - Qazaqstandaǵy jylyjaı sharýashylyǵynyń shamamen 80 paıyzyn qurap otyr.