Senatta Ekonomıkalyq saıasat, ınnovasııalyq damý jáne kásipkerlik komıtetiniń tóraǵasy Asqar Beısenbaevtyń basshylyǵymen «Qazaqstan Respýblıkasyndaǵy eksport saıasatynyń keleshegi men negizgi baǵyttary» taqyryby boıynsha dóńgelek ústel otyrysy boldy, dep habarlady Qazaqstan Respýblıkasy Parlamenti Senatynyń Baspasóz qyzmeti.
Dóńgelek ústel otyrysyna komıtet músheleri Mıhaıl Bortnık, Muratbaı Joldasbaev, Álimjan Qurtaev, Manap Kóbenov, Edil Mamytbekov, Erik Sultanov, salalyq mınıstrlikter men mekmelerdiń basshylary, bıznes qaýymdastyqtarynyń ókilderi qatysty.
Dóńgelek ústel otyrysyn asha kelip A. Beısenbaev, Memleket basshysynyń «Qazaqstannyń úshinshi jańǵyrýy: jahandyq básekege qabilettilik» Joldaýynda básekege qabiletti eksporttyq óndiristi damytý jáne 2025 jylǵa deıin shıkizattyq emes eksportty birte-birte ulǵaıtý negizgi basymdyqtardyń biri retinde belgilengenin atap ótti.
Komıtet tóraǵasy sondaı-aq ekonomıkaǵa túsetin eksporttyq túsimniń keıinnen ınvestısııada mýltplıkatıvtik áseri bolatynyn atap ótti. Eksport kapıtaldyń halyqaralyq qozǵalysyna, jańǵyrtýdy arttyrýǵa, óndiristi ilgeriletýge, básekelestikti údetýge, ǵylymı-tehnıkalyq damýdy jedeldetýge járdemdesetin bolady. Ekonomıkanyń kólik, qarjy, týrızm, bilim berý, medısına, ǵaryshtyq qyzmet jáne ǵarysh apparattaryn synaqtan ótkizý sekildi sektorlary básekelestikte artyqshylyqtarǵa ıe jáne eksportty óristetýde áleýeti zor. Kólik qyzmetin kórsetýdiń de eksporttyq áleýeti mol.
Ulttyq ekonomıka mınıstri Tımýr Súleımenov senatorlardyń aldynda «Qazaqstan Respýblıkasynyń 2018-2022 jyldarǵa arnalǵan ulttyq eksporttyq strategııasynyń» negizgi kórsetkishteri týraly baıandama jasady. Onyń baıandamasynda elimizde shıkizattyq emes ónimder men qyzmet kórsetýler eksporty kóleminiń ulǵaıýy 2022 jylǵa qaraı 31,8 mıllıard AQSh dollaryn quraıtyny atap ótildi. Qazaqstannyń 10 jyldaǵy eksportynyń jalpy kóleminiń 99 paıyzynan astamyn quraıtyn taýar kórsetkishteriniń 667 túrinen «eksporttyq qorjyndaǵy» keleshegi bar taýarlar men qyzmet kórsetýlerdi aıqyndaý nátıjesinde qazirgi kezdegi 76 jáne jańa 40 taýar túri belgilendi. Mınıstrdiń aıtýynsha, agroónerkásip salasynyń eksporttyq saıasaty aýyl sharýashylyǵynyń ónimderin áleýetti naryqtarǵa nysanaly túrde jiberýdi qoldaý negizinde qalyptasatyn bolady.
T. Súleımenov syrtqy saýda kedergilerin joıý maqsatynda artyqshylyqqa ıe saýda týraly kelisim jasaý týraly, sondaı-aq veterınarlyq jáne karantındik (fıtosanıtarlyq) talaptar boıynsha ekijaqty kelissózder júrgizý kózdelip otyrǵany jaıynda habardar etti. Ashyq tústi munaı ónimderin eksporttaýdy yntalandyrý jáne qara tústi munaı ónimderin odan ári óńdeý maqsatynda eksporttyq keden bajdaryn túrlendirý týraly máseleni pysyqtaýǵa týra keledi.
Investısııa jáne damý mınıstrligi 2017 jyly 10 saýda mıssııasy josparlanǵanyn, otandyq taýar óndirýshilerdiń shetelderdegi 40 salalyq kórmelerge qatysqany, 4 kórmede sýretti-bezendirý sıpatyndaǵy ulttyq qabyrǵa túrinde jáne 7 jarnamalyq-tanystyrý sharalary uıymdastyrylǵanyn habarlady.
Aýyl sharýashylyǵy mınıstrliginiń esebinde aýyl sharýashylyǵy ónimderiniń eksporty men olardyń óńdelýi 2017 jylǵy qańtar-tamyz aılarynda 1 347,9 mıllıon AQSh dollaryn quraǵany atap ótildi.
Qarjy mınıstrligi 2017 jylǵy tamyz sońyndaǵy jaǵdaı boıynsha shıkizattyq emes taýarlardyń eksporttyq aınalymdaǵy úlesi 31 paıyzdy quraǵanyn jetkizdi.
Pikirlesýge «Atameken» ulttyq kásipkerler palatasynyń jáne «KazakhExport» eksporttyq saqtandyrý kompanııasy» aksıonerlik qoǵamynyń ókilderi de qatysty.
Dóńgelek ústeldi qorytyndylaı kelip, Senat komıtetiniń tóraǵasy Asqar Beısenbaev aıtylǵan ózekti máseleler Ulttyq eksport strategııasynda jáne elimizdiń zańnamasynda sheshimderin tabýy tıis ekenin atap ótti. Sharaǵa Parlament Senaty depýtattarynyń, memlekettik organdardyń, bıznes pen sarapshylar qaýymdastyqtary ókilderiniń belsendi qatysýy elimizdiń syrtqy saýda qyzmetin damytýǵa baǵyttalǵan ońtaıly usynystardy ázirleýge yqpal etetinine senim bildirdi.