Taıaýda Abaı atyndaǵy respýblıkalyq mamandandyrylǵan daryndy balalarǵa arnalǵan mektep-ınternat 60-jyldyq mereıtoıyn atap ótti. Qazaq tili men ádebıetin tereńdete oqytatyn mektepten belgili memleket jáne qoǵam qaıratkerleri, ǵalymdar, qalamgerler men óner sheberleri túlep ushqan. Olardyń qatarynda kompozıtor Keńes Dúısekeev, Parlament Májilisiniń Halyqaralyq ister, qorǵanys jáne qaýipsizdik komıtetiniń tóraǵasy Máýlen Áshimbaev, Qazaqstan Respýblıkasy Prezıdentiniń baspasóz hatshysy Aıdos Úkibaı, «Egemen Qazaqstan» respýblıkalyq gazeti» AQ Basqarma tóraǵasy Darhan Qydyráli sııaqty belgili tulǵalardy ataýǵa bolady.
Almatydaǵy О́.Joldasbekov atyndaǵy Stýdentter saraıynda ótken mereıli jıynǵa qoǵam qaıratkeri Talǵat Mamashev, burynǵy UQK tóraǵasy, general-leıtenant Ádil Shaıahmetov, Qazaqstannyń eńbek sińirgen qaıratkeri Orynsha Qarabalına-Qazybaeva, aqyn Serik Qalıev jáne mekteptiń ardager ustazdary men túlekteri qatysty. Saltanatty jıynda ardager muǵalimderge qurmet kórsetilip, mereıtoılyq tósbelgiler tabys etildi. Jalpy, bul bilim mekemesinde ulttyq tárbıege basymdyq berilgenin erekshe aıtqan abzal.
– Qazirgi tańda mektebimizde 425 bala bilim alýda. Qazaq tili, orys tili, aǵylshyn tilimen qatar, bıyl túrik jáne qytaı tilderin engizip otyrmyz. Respýblıkalyq mektep-ınternatqa aýyldyń qarapaıym qaradomalaq balalary keledi. Olar osy mektepten bilim alyp, dáris alyp, el tanyǵan tulǵalarǵa aınalyp jatady, – deıdi atalǵan mektep-ınternattyń dırektory Roza Erbozymqyzy.
Bul bilim ordasy bastapqyda Qazaqstannyń túkpir-túkpirinen kelgen malshy qaýymnyń, aýyl sharýashylyǵy eńbekkerleriniń, kóp balaly otbasylardyń balalaryna arnap ashylǵan bolatyn. Oqýshylar men belgili tulǵalar arasynda salıqaly suhbat ispetti jyly júzdesýler kóptep uıymdastyrylatyndyqtan, tulǵataný sabaǵynyń bir jarqyn úlgisi osy oqý ordasynda qalyptasqan deýge bolady. Sondaı kezdesýlerdiń birinde Qazaqstannyń halyq jazýshysy Ázilhan Nurshaıyqov balalardyń ónerine tánti bolyp, «Men mektepke mashınamen kelip edim, endi ushaqqa mingendeı bolyp qaıtyp baramyn. Oqýshylardyń ánderin estigende fılarmonııada, qoıylymyn kórgende drama teatrynda, óleńderin oqyǵanda Jazýshylar odaǵynda otyrǵandaı sezindim», depti.
Sol sııaqty saltanatty keshti mektep-ınternattyń ónerpazdary dóńgeletip áketti. Bilim jáne ǵylym mınıstri E.Saǵadıevtiń quttyqtaýyn mınıstrliktiń Mektepke deıingi jáne orta bilim, aqparattyq tehnologııalar departamentiniń dırektory Sh.Karınova jetkizdi. Pedagogıka qyzmetkerleriniń ishinde Uljalǵas Aǵybaeva, Sáýle Shabdenova, Lázzat Nazhanova jáne Ardaq Júsipbekova Y.Altynsarın atyndaǵy tósbelgimen, Gúlmıra Taıǵarına, Saltanat Qalmanbetova jáne tárbıeshi Ryshan Ahmetova «Bilim berý isiniń qurmetti qyzmetkeri» medalimen marapattaldy.
Túlekter, ásirese, ǵumyrynyń 57 jylyn bilim salasyna arnaǵan, «Ustaz baqyty», «Ustaz júgi qashanda aýyr» sııaqty kóptegen kitap jazǵan Orynsha Qarabalına-Qazybaevaǵa aıryqsha qurmet kórsetti.
– Bizdiń oqýshylar mektepten bilim ǵana emes, úlken tárbıe aldy, ózdiginen izdenýge, eńbekke úırendi. Balalardyń shyǵarmashylyq qabiletterin damytýǵa múmkindik jasadyq. Qazirgi jańartylǵan oqý baǵdarlamasynda alǵan bilimdi ómirge jaratý, paıdalaný degen qaǵıda bul mektepte erte kezden bastaldy, – deıdi ulaǵatty ustaz.
Aınash ESALI, «Egemen Qazaqstan»