Fýtbol klýbtary arasyndaǵy ÝEFA-nyń reıtıngine kóz salyńyzshy. 72 qatardan «Astanany» tabasyz. Bul mejeni qazaqstandyq klýbtardyń arasynda birinshi bolyp baǵyndyrǵan «Astana». Bir attasa Máskeýdiń «Dınamosyn», eki attasa aǵylshyndardyń «Evertonyn» qýyp jetetin áleýeti bar.
«Astana» Eýrokýbok oıyndarynda óz alańynda 17 match boıy múldem utylmapty. 17 matchtyń toǵyzyn jeńip, segizimen teń túsipti. Madrıdten «Atletıko» kelip gol soǵa almaı ketipti, Lıssabonnan «Benfıka» kelip bir upaı arqalap qaıtypty. Osydan 5 jyl buryn mundaı dúnıe ertegideı estiletin, búgin mine shyndyqqa aınaldy. Biraq, «Astanany» óz úıinde ǵana azý kórsetip, jyraqqa shyqsa quıryǵyn basyp qasha jóneletin qorqaýǵa teńegender kóp boldy. Statıstıka da sony meńzeıdi, 17 oıynda tek Iýrmalanyń «Spartagyn» utypty. Endi mine, Tel-Avıvtiń «Makkabıin» utyp, tarıhı jeńiske qol jetkizdi. Tarıhı deıtin sebebimiz, «Astana» Eýropada alǵash ret bir komandany úıde de, túzde de utyp otyr. Toptyq kezeńdegi oıynda alǵash ret túzde gol jibergen joq. Mundaı jetistik bolmaǵan. Romantıka!
Emosııany qoıyp, naqty áńgimege kóshsek. Búgingi fýtbol estetıkadan alshaqtap barady, naqty nátıjeni maqsat tutatyn pragmatıkalyq oıyn saltanat qurdy. Bul tek «Astananyń» ǵana emes, álemdik fýtbol klýbtarynyń oıyn fılosofııasyna aınaldy. Qorǵaný da óner, al qorǵanyp júrip gol soǵý – fýtboldaǵy eń bıik óner. Osydan birer kún buryn «Tottenhem» óz alańynda bılep tóstemeı-aq «Realdy» jeńdi, ústemdik qurmaı-aq úsh upaıyn aldy. Eń basty qundylyq – nátıje. «Astananyń» oıyny da súısinip qaraıtyndaı, telmirip tamashalaıtyndaı, sheber pas shyǵaryp, jyldam dop almasyp, alańda ústemdik quryp, qarsylastyń qaqpasyna topyrlatyp gol soǵatyn, pozısııalyq shabýyl jasaýda eshkimge des bermeıtin estetıkalyq deńgeıdegi oıyn emes. Stanımır Stoılov qorǵanysqa kóp kóńil bóledi, oıyn taktıkasy qorǵanystyń negizinde qurylǵan. Ortadan dopty tartyp alǵan jaǵdaıda jelmen jarysatyn Tvýması, Tomasov sekildi jelaıaq oıynshylar, gol soǵatyn Kabananga deıtin bombardır bar. Árıne, bul «Astananyń» ishki birinshiliktegi oıyndaryna qatysy joq. Biraq, Eýropaǵa basqasha beıimdeli múmkin emes.
Astana qatarynan úshinshi jyl Eýrokýbok oıyndarynyń toptyq kezeńinde oınap keledi. Jyl saıyn ilgerileý bar. Ár qatelikten sabaq alady, árbir matchtan tájirıbe jınaıdy. Keshegi oıyn sony kórsetti.
Máselen, 2015-2016 jylǵy maýsymda Chempıondar lıgasynyń toptyq kezeńinde «Atletıko» (Madrıd), "Benfıka" (Lıssabon), "Galatasaraı" (Stambul) sııaqty azýly komandalarmen bir topqa tústi. 5 gol soǵyp, 11 gol (toptaǵy eń tómen kórsetkish) jiberdi. Birde-bir matchty jeńe almaı, tórt oıynda teń tústi.
2016-2017 jyl. Eýropa lıgasynyń V tobynda «Iаng Boız» (Bern), APOEL (Nıkosııa) jáne «Olımpıakospen» (Pıreı) sekildi komandalarmen joly túıisti. Bul topta bir oıynda jeńiske jetip (APOEL 2-1), eki oıynda teń tústi. Taǵy da 5 gol soǵyp, 11 gol jiberdi.
Endi mine, Eýropa lıgasynyń A tobynda «Vılıarreal», «Slavııa» (Praga), "Makkabı" (Tel-Avıv) sekildi fýtbol ujymdarymen pleı-off kezeńine shyǵý úshin úlken talas bolyp jatyr. Bar-joǵy 4 týr ótkizdi, biraq 7 gol soǵyp úlgerdi («Vılıarrealmen» birdeı kórsetkish). 2 oıyndy utyp, bir teń oıynǵa qol jetkizdi. Áli úıde ıspandarmen, túzde chehııalyqtarmen dop tebedi. Demek, 7 upaı aqyrǵy meje emes. «Astana» taǵy bir tarıhı mejeni baǵyndyrýǵa bet aldy. «Astananyń» Eýropadaǵy joryǵy jańa jyldan keıin de jalǵasady degen úmit basym.
Stoılov osy maýsymdy sátti aıaqtaǵannan keıin komandaǵa joǵary deńgeıde oınaıtyn ortalyq qorǵaýshylar shaqyrýǵa sebep bar. Keshe ortalyq qorǵanysta oınaǵan Postnıkov pen Malyı áli de bolsa Logvınenko men Anıchıchti teń dárejede almastyra alatyn oıynshylar emes ekenin dáleldedi. Ásirese, Malyıdyń keshegi oıynyna daq túsirmeı, Postnıkovty synnan aman alyp qalǵan qaqpashy Nenad Erıch boldy. Dál qazir «Astana» Eýrokýboktaǵy oıyndardan 20 mln. eýro kóleminde paıda túsirdi. Komandanyń Eýropaǵa joryǵy jalǵasa berse, túsetin qarjy kólemi de ulǵaıatyny sózsiz. Búgingi fýtbol osy, qorjynyńdy upaımen ǵana emes, qarjylaı da toltyrýǵa bolady. Mundaı olja qazaqstandyq klýbtar úshin eki ese jeńis.
Jandos BAIDILDA,
jýrnalıst