... Osydan otyz jyl burynǵy kúzdiń qara sýyq kúni áli este. Ol kezde aýdandyq gazette ádebı qyzmetkermin, oılamaǵan jerden otbasymyzben kólik apatyna tústik. Ártúrli jaraqat alǵan jolaýshylardy dereý aýrýhanaǵa jetkizgende qabyldaý bólimindegi kezekshi hırýrg-dáriger Murat Muhamedjanov edi. Sondaı sabyrly qalpymen bárimizge aqyl-keńesin aıtyp, shuǵyl járdem kórsetip jatty. Qoly shıpaly, emi daýaly azamattyń jyly lebizi, árbir jolaýshynyń densaýlyǵyna alǵashqy kómekti muqııat kórsetkeni kúni búgingideı kóz aldymda turady. Sodan beri de jyljyp jyldar ótýde. Al odan keıingi jyldary osynaý eńseli ǵımaratta, aýdandaǵy ortalyq aýrýhanada qanshama sátti, sátsiz oqıǵalar bolyp jatty. Sonyń barlyǵy adam taǵdyrymen, adam densaýlyǵymen baılanysty. Bizdiń keıipkerimiz Murat aýdandyq aýrýhanada tek emdeý isiniń qyry men syryn ǵana meńgerip qoımaı, dárigerlik qyzmetti uıymdastyrýdyń san alýan joldaryn jas áriptesterine úıretýden de esh jalyqqan emes. Iá, úlkenge – ini, kishige – aǵa bola bilgen abzal azamattyń ómirderegine úńilseń, qanshama syr, qanshama jyr jatyr.
Tań bozynan jumys ornynan tabylatyn dárigerdi tolǵandyratyn másele de, oılandyratyn kókeıkesti qajettilik te – ol halyqtyń densaýlyǵy. Sol tııanaqty eńbektiń nátıjesinde aýdandaǵy emdeý mekemeleri qazirgi zamanǵy ozyq qural-jabdyqtarmen qamtamasyz etildi. Dúnıejúzilik Damý bankiniń de yqpaly tıip, ótken jyldary japondyq ýltradybystyq zertteý, fıbragastroskop, rentgen, EKG sııaqty 26 túrli medısınalyq jabdyqtarǵa qol jetkizdi. О́kpe aýrýymen aýyratyndar búgingi zamanǵy DOTS terapııasy boıynsha em qabyldaıdy. Ár jylda aýdandyq aýrýhana, emhanany kúrdeli jóndeýden ótkizip, ana men bala densaýlyǵyn únemi nazarda ustaıdy.
– Aýdan aýmaǵynda kópbalaly bes myńnan astam ana turady, – deıdi Murat Muhamedjanov. – Sábılerdiń kóptep dúnıege kelýi qýantady. Demografııalyq kórsetkish jaǵynan aýdanymyz oblys boıynsha aldyńǵy orynda. Elbasynyń “100 mektep, 100 aýrýhana” salý tapsyrmasyna aýdanymyz aldymen ún qosyp, jańa tıpti áıelder bosanatyn gınekologııalyq aýrýhana salyp, paıdalanýǵa berdi.
“Ustazy jaqsynyń – ustanymy jaqsy” degen, ótkende Lýnacharskıı atyndaǵy mekteptiń oblys boıynsha “Úzdik bilim mekemesi” degen atqa ıe bolýyna baılanysty, mektep bitirýshilermen, aýdannyń bir top ardaqty analarymen basqosýy ótken .Altynsarın atyndaǵy mekteptiń baıyrǵy ustazy, Qazaqstannyń eńbek sińirgen muǵalimi Roza Karbýzova apaı óziniń maqtan tutatyn shákirtteriniń ishindegi eń bir shoqtyǵy bıik azamat – osy Murat Muhamedjanov ekendigin áńgimeledi.
Búginde aýdanda bas dárigerdiń orynbasary bolyp qyzmet atqaryp júrgen Murat aǵa 1994 jyly “Qazaqstan Respýblıkasy aýyl turǵyndarynyń ekologııalyq jaǵdaıǵa baılanysty sozylmaly juqpaly emes aýrýlarmen naýqastaný dınamıkasy” degen taqyrypta kandıdattyq dıssertasııa qorǵaǵan. Memleket aldynda sińirgen eńbegi, elimizdiń áleýmettik-ekonomıkalyq damýyna qosqan zor úlesi úshin Densaýlyq saqtaý isiniń úzdigi ataǵyna ıe bolsa, Qurmet gramotasymen, “Shapaǵat”, “Qazaqstan Konstıtýsııasyna – 10 jyl” medalderimen marapattaldy. Talaı ret aýdandyq Keńesiniń, aýdandyq máslıhattyń depýtaty bolyp, eldik máselelerdi sheshýge atsalysty. “Nur Otan” HDP belsendi múshesi, “Panfılov aýdanynyń Qurmetti azamaty” ataǵyn alýyna da tynymsyz eńbegi, jasampaz eńbekqorlyǵy yqpalyn tıgizdi.
Murat aǵanyń áli de halqyna bergeninen bereri kóp, qandaı qurmetke de laıyqty azamat. О́zinen keıin ergen ini-qaryndastarynyń bárin tárbıelep, qatarǵa qosýy da elge úlgi-ónege. О́mirlik jary uzaq jyldar ustaz bolǵan Turahan Dúısenova ekeýi úsh bala tárbıelep ósirgen úlgili otbasy.
Baqqaısha MUSAǴITOVA, Almaty oblysy, Panfılov aýdany.