EKSPO-2017 kórmesi aýmaǵyndaǵy týrıstik aımaq óz jumysyn bastaıdy. Endi halyqaralyq sharanyń sımvolyna aınalǵan sfera – «Nur Álem» pavılony, Art-ortalyq, Úzdik tájirıbeler aımaǵy jáne Taqyryptyq pavılon syndy tórt nysan Astana qonaqtaryna qyzmet kórsetetin oryn retinde qaıta ashylmaq. Saltanatty sharaǵa oraı elorda turǵyndary men meımandary 11-12 qarasha kúnderi EKSPO-2017 kórmesinen qalǵan týrıstik nysandardy tegin aralaı alady.
«EKSPO-2017 kórmesiniń burynǵy aýmaǵyna kirý – tegin. Al jekelegen pavılondar men «Nur Álemge» kirý úshin bılet satyp alý qajet. Alǵashqy eki kún boıy týrıstik aımaqqa bıletsiz kirýge bolady. Odan keıingi kirý quny 1500 teńge kóleminde bekitildi. Munda jeńildik bıletteri de qarastyrylǵan. Máselen, stýdentter 800 teńgege, kóp balaly analar men zeınetkerler – 500 teńgege jáne múgedekter men Uly Otan soǵysy ardagerleri, alty jasqa deıingi balalar men jetim balalar tegin kire alady. Bıletterdi resmı saıttan jáne arnaıy satý oryndarynan alýǵa bolady», deıdi «Astana EKSPO-2017» ulttyq kompanııasy Kontent jáne is-sharalardy uıymdastyrý departamentiniń dırektory Marat Omarov.
Taǵy bir mańyzdy jańalyq, bıylǵy qys maýsymynda EKSPO aýmaǵynda erekshe pishindegi muz aıdyny ashylady jáne onda elimizdiń jańajyldyq bas shyrshasy ornatylady. «Astana EKSPO-2017» UK» AQ Kommersııalandyrý departamentiniń dırektory Dáýlet Erkimbaevtyń málimetinshe, arnaıy elorda turǵyndary men qonaqtary úshin 11 qarashada EKSPO aýmaǵynda muz aıdyny ashylady. «Onyń jalpy aýmaǵy 3500 sharshy metrden asady jáne pishini de erekshe bolmaq. Buryn-sońdy elimizde mundaı muz aıdyny salynbaǵan», deıdi ol.
Jeltoqsan aıynyń basynda EKSPO aýmaǵyna elimizdiń jańajyldyq bas shyrshasy ornatylady jáne muz qalashyǵy boı kóteredi. «Munyń barlyǵy EKSPO-nyń bas ǵımaraty «Nur Álem» sferasy men amfıteatr aralyǵynda ornalastyrylady. Bas shyrshamen birge jyl saıynǵy «Han Shatyr» saýda jáne oıyn-saýyq ortalyǵy mańyna salynyp kelgen muz qalashyq ta kórme mańyna kóshiriledi. Barlyq jumystar Astana ákimdigimen birlesip atqarylýda», dedi departament basshysy.
Muz qalashyǵynyń bir seansyna 1000 teńge tólep kirýge bolady jáne onda 4 saǵat ýaqyt ótkizýge múmkindik bar. Sondaı-aq munda jańa konkılerdi jalǵa berý isi uıymdastyrylady jáne onyń da baǵasy shamamen 1000 teńgeni quramaq. Taǵy bir atap óterligi, keshenge 6 jasqa deıingi balalar úshin kirý tegin. Oqýshylar men zeınetkerlerge 50 paıyzdyq jeńildikter qarastyrylǵan.
Esińizde bolsa, Qazaqstan Prezıdenti Nursultan Nazarbaev EKSPO-2017 halyqaralyq mamandandyrylǵan kórmesiniń jabylý saltanatynda «Nur Álem» ǵımaraty men taqyryptyq pavılondardyń energııa mýzeıi retinde óz jumysyn jalǵastyratynyn málimdegen edi. Kórmege deıin EKSPO-2017 aýmaǵyndaǵy ǵımarattardyń bir bóligin «Astana» halyqaralyq qarjy ortalyǵyna, Halyqaralyq «Jasyl» tehnologııalardy damý ortalyǵyna jáne Halyqaralyq IT-startaptar tehnoparkine berý týraly sheshim qabyldanǵan bolatyn.
Ashat RAIQUL, «Egemen Qazaqstan»