Velosıpedpen álemdi sharlap júrgen fransýz Roman Pıshar Qaraǵandyǵa keldi. Jol júrýge onyń 14 aıy ketken. Osy ýaqyt aralyǵynda ol 23 elde bolypty.
– Men Fransııada ınjener bolyp jumys isteımin, – deıdi ol. – Bizde ár adam jumystan bir jylǵa úzilis ala alady jáne sol ýaqytta ózi qalaǵan ispen aınalysyp, ýaqytynda qaıta jumysyna keledi. Men de sondaı úzilis alyp, aldyma Mońǵolııaǵa deıin jetemin degen maqsat qoıǵan edim. Alaıda, oǵan úlgermeımin, sebebi kún sýytty. Menińshe Astanaǵa deıin baramyn, al ol jaqtan Fransııaǵa ushamyn. Aǵymdaǵy jyldyń 1 jeltoqsanynda jumysqa shyǵýym kerek.
Romannyń aıtýynsha, ol óz elinde múldem avtokólikke otyrmaıdy eken, onyń oıynsha kólik ekologııaǵa zııan keltiredi jáne qyzmeti tym qymbat. Jumysy men jeke kezdesýlerine velosıpedpen barady. Sol sebepti saıahat úshin de kóliktiń osy túrin tańdaǵan.
Barlyq júrip ótken jolynda Roman velosıpedten basqa esh kólikke otyrmaǵan. Ol shatyrlarda qonyp, tamaqty otta daıyndaǵan, qol sham men uıaly telefonyn kishkene kún batareıasynyń kómegimen qýattap otyrǵan.
Saıahaty barysynda ol Italııa, Shveısarııa, Túrkııa, Iran, Grýzııa, О́zbekstan, Túrikmenstan, Tájikstan jáne basqa elderde boldy. Roman atap ótkendeı, jolda shaǵyn apattan basqa eshqandaı oqys oqıǵa bolmaǵan. Apat saldarynan dóńgelegi jarylyp qalypty.
– Men Iranda eki aı boldym, – deıdi saıahatshy. – Ol jerden ózime dostar taptym. Barlyǵy maǵan ol elge barý qaýipti, sen qatelik jasaısyń degen-di. Biraq nátıjesinde olaı bolmaı shyqty. Men onda bolǵanymda ol sózderdiń jalǵan ekenin túsindim. Iran – men bolǵan elderdiń ishindegi eń súıiktisi.
Roman Qazaqstanda kidirem dep oılamaǵan. Alaıda Qaraǵandy mańynda 200 shaqyrym jerde ornalasqan avtokeshenge kirgennen soń jospary ózgergen.
– Sol kúni keshkilik men avtokeshenge bardym, – dep bastady áńgimesin turaqtyń ıesi Ǵazız Ysqaq. – Romandy kórip, onymen sóılesip kettim. Ol Shýdan Qaraǵandyǵa deıin kelip Qazaqstan týraly eshteńe bilmegen. Men namystandym. Men oǵan bizdiń qazaqstandyq qonaqjaılyǵymyzdy kórsetýdi sheshtim. Meniń avtokeshenimde saýna bar, biz sonda bardyq, keshki as ishtik. Dál osy ýaqytta bizdiń keshende halyq aspaptar ansambli bolǵan-dy. Men olardan Roman úshin aspaptarynda oınap berýlerin suradym. Oǵan dombyranyń úni erekshe unady. Ol tipti ózi oınap kórmek boldy.
Qaraǵandyda Romandy Ǵazızdiń týystary kútip alyp, biraz qalýyn surap, et asyp, qalany aralatqan.
Romannyń sózinshe, osy saıahattan soń onyń álemge degen kózqarasy ózgergen, tipti eline oralǵan soń óziniń ómir stılin ózgertýi de múmkin.
– Men jalpy adamdarǵa qatysty pessımısttik oıda boldym, – deıdi ol. – Adamdar osynsha meıirimdi jáne jaqsy dep oılamadym. Bul saıahat meniń adamdarǵa degen pikirimdi ózgertti.
Mıras ASAN,
«Egemen Qazaqstan»
Qaraǵandy oblysy