О́skemendegi Oralhan Bókeı atyndaǵy qalalyq ortalyq kitaphanada aqyn, dramatýrg Áskerhan Aqtaıdyń «Sezim pernesi» atty shyǵarmashylyq keshi ótti.
Qalyń qazaq shoǵyrlanǵan Mońǵolııanyń Baıan О́lgeı aımaǵynda dúnıe esigin ashyp, 2009 jyly Atajurtqa oralǵan talant ıesi sońǵy 4-5 jyldyń muǵdarynda halyqaralyq, respýblıkalyq músháıralardyń aldyn bermeı júrgeni jyrsúıer qaýymǵa aıan. Qyryqtan asqan shaǵynda shabyty tasqyndaǵan aqynǵa «poezııaǵa nege kesh keldińiz?» degen saýaldyń jıi qoıylýy da zańdy sekildi. Bul kúni Altaıdyń ar jaǵynan, Besboǵda baýraıynan elge kelip, jalyndy jyrymen jarq etip kórinip, jurtty jalt qaratqan Áskerhan Aqtaı shyǵarmashylyǵyna qyzyǵýshylyq tanytyp, suraq qoıýshylar kóp boldy. «О́leń – Ala taǵalanyń bergen syıy. Halyqtyń qazynasy. Eń bastysy, ata-babamyzdyń qanymen boıymyzǵa sińgen qasterli óner - óleńdi eldiń ıgiligine, jurttyń kádesine jarata alsaq bolǵany. Al óleńniń ómirsheńdigin ýaqyt kórsetedi. Poezııaǵa keshigip keldim dep aıta almaımyn. Kerisinshe oqyrman qalyptasqan, suranys bolǵan ýaqytta keldim dep oılaımyn. О́zim dástúrli jáne jyraýlyq poezııanyń úlgisimen jazamyn. Bul baǵyttaǵy óleńderge jurttyń qyzyǵýshylyǵy joǵary», - deıdi ol.
«Altynmen aptalǵan aıqasty erińdi eki balýan áreń kóterdi,
Kúmis júgenimdi eki ul áreń áperdi», - dep jurttyń aıbynyn asqaqtatyp, rýhyn kóteretin jyr jazatyn aqynǵa shara barysynda ózi týyp-ósken Baıan О́lgeı aımaǵy men О́skemenniń zııaly qaýym ókilderi lebizderin bildirdi.
«Esikten kirgende qazaqy ıis ańqyp qoıa berdi. Qazaqtyń súri qazysy men qymyzynyń ıisi. Apyrmaý, bul qaıdan kelgen desem, О́lgeıden kelgen eken» dep aǵynan jarylǵan aqyn, jazýshy Álibek Qańtarbaev Á.Aqtaı qazaq poezııasyna jańa lep ákelgenin aıtty.
Azamat QASYM, «Egemen Qazaqstan»