Elordada Din isteri jáne azamattyq qoǵam mınıstrliginiń uıymdastyrýymen Qoǵamdyq keńesterdiń I respýblıkalyq májilisi ótti. Basqosýda qoǵamdyq keńesterdiń qyzmetin jetildirý boıynsha usynystar ázirleý men osy baǵytta oń tájirıbelermen almasý jaıy, sondaı-aq olardyń memlekettik organdardyń arasynda ózara yntymaqtastyqqa negizdelgen áriptestik aıasyn odan ári damytýdyń tetikteri men baǵyttary talqylandy.
Jıynǵa Parlament Senaty men Májilisiniń depýtattary, Premer-Mınıstrdiń orynbasary Erbolat Dosaev, Din isteri jáne azamattyq qoǵam mınıstri Nurlan Ermekbaev, BUU Damý baǵdarlamasynyń Turaqty ókili Mýnhtýı Altangerel jáne qoǵamdyq keńester men sarapshylar qaýymdastyǵynyń ókilderi, memlekettik organdar men halyqaralyq uıymdardyń jetekshileri qatysty.
Alqaly keńestiń ashylý saltanatynda sóz alǵan Premer-Mınıstrdiń orynbasary E.Dosaev Qazaqsan Respýblıkasy Premer-Mınıstri B.Saǵyntaevtyń quttyqtaý hatyn oqyp berdi.
«Barshańyzdy qoǵam, Parlament jáne atqarýshy bılik ókilderiniń basyn biriktirgen I respýblıkalyq qoǵamdyq keńester májilisiniń ótýimen quttyqtaımyn. Búgingi tańda "100 naqty qadam" Ult josparyn júzege asyrý aıasynda túrli deńgeıde 229 Qoǵamdyq keńes quryldy, olardyń quramynda 4 myńnan astam adam qyzmet etedi. Qoǵamdyq keńester qyzmeti memlekettik organdardyń jumysynda ashyqtyq pen bılikke degen senim deńgeıin ulǵaıtýǵa, iske asyrylyp jatqan memlekettik baǵdarlamalar men bastamalar týraly jarııalylyqty arttyrýǵa, sondaı-aq azamattardyń memlekettik basqarýǵa keńinen qatysýyna múmkindik berdi. Búgingi májilistiń syndarly oı men salıqaly pikir almasý, tájirıbe bólisý alańynyń bastaýy bolatynyna úlken úmit artamyn. Respýblıkalyq qoǵamdyq keńester májilisi qoǵamdyq-saıası jáne áleýmettik-ekonomıkalyq prosesterdi damytýǵa úles qosyp, memlekettik jáne qoǵamdyq ınstıtýttardyń tıimdi jumys isteýine jańa serpin beretinine senimdimin», delingen quttyqtaý hatta.
Búginde elimiz boıynsha óz qyzmetin usynyp otyrǵan 200-den astam qoǵamdyq keńestiń 16-sy respýblıkalyq deńgeıde bolsa, 213-i óńirlik deńgeıde jumys isteıdi eken. Al jalpy Qoǵamdyq keńesterdiń quramyna múshelikke tirkelgender sany 4 055 adam ári onyń 818-i úkimettik emes uıymdardyń ókilderi.
Negizinen, «100 naqty qadam» Ult josparyn iske asyrý sheńberinde memlekettik organdar men azamattyq qoǵam arasyndaǵy dıalogtyń nysany retinde Qoǵamdyq keńester ótken jyly qurylǵan edi. Memlekettik emes uıymdar retinde tirkelgen mundaı keńester úkimettik sheshimderdi qabyldaýdyń ashyqtyǵyn arttyrýǵa arnalǵan konsýltasııalyq baqylaýshy organdar retinde tanylǵan. Sondyqtan da qoǵamdyq keńester qurylǵaly beri 9 myńnan astam normatıvtik-quqyqtyq aktilerdiń jobalary qaralyp, Keńes músheleri tarapynan atalǵan jobalarǵa qatysty tıisti eskertýler men usynystar berilipti. Atap aıtqanda, turǵyndardy taza aýyz sýmen qamtamasyz etý, sanıtarlyq-epıdemıologııalyq jaǵdaıdy jaqsartý jáne medısınalyq qyzmet kórsetý sapasyna qatysty máseleler boıynsha qoǵamdyq tyńdaýlarda 600-den astam áleýmettik mańyzdy problemalar da qarastyrylǵan.
«Keńesterdiń qyzmeti esep beretin jáne ashyq memleket qalyptastyrý úderisine oń áserin tıgizýde jáne myńdaǵan belsendi azamattarǵa eldiń qoǵamdyq ómirine qatysýyna múmkindikter berilip, bılik pen buqaranyń arasyna dáneker bolatyn baılanystyrýshy joldar ashylýda», dedi N.Ermekbaev.
Alǵash ret uıymdastyrylǵan Qoǵamdyq keńesterdiń jalpy jıynynda olardyń qazirgi qyzmet aıasyndaǵy mártebesin kóterý jaıy keńinen sóz boldy. Sonymen qatar, máslıhattardyń qyzmetine uqsas qoǵamdyq keńesterdiń fýnksııalaryn joıý úshin keńestiń ókilettikterin ózgerte otyryp, uıym jumysynda memlekettik organdar músheleriniń ókildik deńgeıin tómendetý sııaqty birqatar ózekti máseleler de kún tártibine shyǵaryldy.
«Nátıjesinde, búginde qoǵamdyq keńester qyzmetiniń tájirıbesi qalyptasyp, qyzmet aýqymy keńeıýde. Oǵan qosa, qoǵamdaǵy ózekti máseleler boıynsha azamattardyń pikiri eskerilip, ońtaıly sheshimder qabyldanýda. Ásirese, aýyz sý men densaýlyq saqtaý salasy syndy túıini tarqatylmaǵan áleýmettik máselelerdi sheshýde mundaı keńester naqty qoǵamdyq ınstıtýt retinde tıimdi dıalog alańyna aınaldy dep aıta alamyz», dedi N.Ermekbaev.
Búginde keńes jumysyn jetildirý maqsatynda halyqpen buqaralyq aqparat quraldarynyń ózara is-qımylyn nyǵaıtý, jumys tıimdiligin damytý, ońtaıly tájirıbelerdi talqylaý taqyryptarynda udaıy pikirtalastar men semınarlar uıymdastyrylyp turady. Sonymen qatar, qoǵamdyq keńesterdiń qyzmetine arnalǵan jáne olardyń tájirıbesin zerdeleýge múmkindik beretin kazkenes.kz biryńǵaı aqparattyq resýrsynyń qurylǵanyn eskerte ketken jón.
«Qoǵamdyq keńester: is-tájirıbe jáne memleket pen qoǵamnyń ózara árekettesý tetikteri» taqyrybynda uıymdastyrylǵan plenarlyq otyrys qorytyndysy boıynsha qatysýshylardyń naqty sheshimderi men usynystary negizinde arnaıy qarar qabyldandy.
Osy kúni tús aýa Prezıdent janyndaǵy Ortalyq kommýnıkasııalar qyzmetinde Qoǵamdyq keńesterdiń respýblıkalyq májilisin qorytyndylaǵan baspasóz máslıhaty ótti. Azamattyq qoǵam komıtetiniń tóraıymy Álııa Ǵalymova, Din isteri jáne azamattyq qoǵam salasyndaǵy Qoǵamdyq keńestiń múshesi, «Aımaq» QQ tóraıymy Aıgúl Soloveva, Almaty qalasy qoǵamdyq keńesiniń múshesi, «Bolashaq» halyqaralyq qozǵalysy men «Jastar úni» jastar qoǵamdyq birlestiginiń tóraǵasy Dáýren Babamuratov, Shyǵys Qazaqstan Qoǵamdyq keńesiniń múshesi, oblystyq máslıhat depýtaty Oleg Chernyshev, Prezıdent janyndaǵy Qazaqstan strategııalyq zertteýler ınstıtýtynyń áleýmettik-saıası zertteýler bóliminiń basshysy Alýa Joldybalına qatysqan baspasóz máslıhatynda spıkerler aýqymy keń alqaly basqosýdyń jumys nátıjeleri týraly baıandady. Sondaı-aq, qoǵamdyq keńesterdiń qyzmetin jetildirý jónindegi ádistemelik nusqaýlyq pysyqtalǵany da aıtyldy.
Á.Ǵalymova Qoǵamdyq keńesterdiń I respýblıkalyq májilisiniń negizgi mindeti – qoǵamdyq keńesterdiń qyzmetin jetildirý boıynsha oń tájirıbe men usynystardy ortaǵa salý jáne pikir almasý arqyly ońtaıly sheshimder qabyldaý bolyp tabylatyndyǵyn tilge tıek etti.
«Eki jyldyq jumys barysynda qoǵamdyq keńester tıisti mindetti iske asyrý arqyly ózderiniń tıimdiligin dáleldedi. Sonymen qatar, qoǵamdyq keńester tarapynan qoǵamdyq baqylaýdyń 4 tetigi engizildi. Olar: memlekettik organdardyń negizgi baǵyttary boıynsha qoǵamdyq monıtorıng ótkizý, memlekettik organdardyń qoǵamdyq mańyzy bar sheshimderin qoǵamdyq tyńdaýlar men talqylaýlar, azamattardyń quqyqtary, bostandyqtary men mindetterine qatysty normatıvtik-quqyqtyq aktiler jobalaryn saraptaýdyń tetikteri, memlekettik organdar jáne laýazymdy tulǵalar jumysynyń nátıjeleri týraly esepterdi tyńdaý», dedi ol óz sózinde.
Nurlybek DOSYBAI,
«Egemen Qazaqstan»
Sýretti túsirgen Erlan OMAROV