Taraz qalasynda ornalasqan Baýyrjan Momyshuly atyndaǵy №45 qazaq klassıkalyq gımnazııasy búginde respýblıka boıynsha aldyńǵy qatarly bilim oshaqtarynyń birinen sanalady. Jyl saıyn Jambyl oblysy boıynsha ulttyq biryńǵaı testileýden úzdik kórsetkish kórsetip kele jatqan gımnazııa da osy. Tek qana sapaly bilim berýdi maqsat etken bilim oshaǵy birneshe býyn bilimdi azamattardy tárbıelep shyǵardy.
El gazetiniń bolashaq urpaqtyń bilimin eselep, kózqarasyn qalyptastyrýda yqpaly úlken. Osy oraıda «Egemen Qazaqstan» gazetiniń uzaq jyldar boıy óńirdegi menshikti tilshisi bolyp qyzmet atqarǵan ardager jýrnalıst Maqulbek Rysdáýletpen birge atalǵan gımnazııaǵa arnaıy at basyn burdyq. Gımnazııa dırektory Farıda Shortanbekova áýeli bilim oshaǵymen tanystyrdy. Máselen, gımnazııanyń jumysyna qanaǵattanǵan ata-analar bilim oshaǵyndaǵy 24 kabınetti 1,5 mıllıon teńgege tolyq aqparattyq tehnologııamen jabdyqtap beripti. Sondaı-aq 11 «A» synybynyń aǵylshyn tili sabaǵynyń bir tobymen de kezdesip, suhbattasýdyń sáti tústi. Osy synypta oqıtyn Kamıla Zýlfýharova ótken oqý jylynda FLEX halyqaralyq baıqaýynyń nátıjesi boıynsha AQSh-ta bilim alyp kelipti. Sonymen qatar Nuraı Mombekova da bıylǵy oqý jylynda atalǵan memlekette bilim alýda.
Munda 1991 jyldan beri Baýyrjan Momyshuly murajaıy jumys isteıdi. Murajaıda «Batyrǵa taǵzym», «Azamat. Qalamger. Qaharman», «Uly Otan soǵysy kezinde paıdalanylǵan zattar, nagradalar men áskerı kıimder eksponattary», «Baýyrjan týyndylary», «Baýyrjan – 100 jasta» jáne «Táýelsizdikke – 25 jyl» dep atalatyn bólimder bar. Batyrdyń kózi bolǵan qundy jádigerlerdi munda batyrdyń kelini Zeınep Ahmetova tapsyrǵan eken.
Pedagogıkalyq ujymmen kezdesý barysynda qalamger-jýrnalıst M.Rysdáýlet bas gazettiń búgingi baǵyty týraly pikirin bildirdi. «Ǵasyrlyq tarıhy bar ata basylym – qazaq rýhanııatynyń qara shańyraǵy. Munda Sáken Seıfýllın, Beıimbet Maılın sııaqty Alash arystarynan bastap, Sherhan Murtaza, Ábish Kekilbaev sııaqty áıgili jazýshylarǵa deıin qyzmet atqarǵan. Búgingi tańda bas gazetimiz el oqıtyn, halyqtyń rýhanı suranysyn qanaǵattandyratyn dúnıelerdi kóptep berýimen erekshelenedi. Máselen, «Kókeıkesti», «Máseleniń mánisi» aıdarlary halyqtyq máselelerdi kóterse, «О́ńir ómiri» aıdary óńirlerdiń tynys-tirshiligin beıneleıdi. Al ustazdarǵa arnalǵan «Tálim» beti elimizdiń ár qıyryndaǵy ustazdardyń oılaryn, jumys tájirıbesi men ıdeıalaryn jarııalaıdy», dep atap ótti. Sondaı-aq gımnazııa dırektory F.Shortanbekova ustazdarǵa arnalǵan «Tálim» beti úshin redaksııa basshylyǵyna rızashylyǵyn bildirdi. «Urpaq tárbıeleýde ustazdardyń eńbegi erekshe. Ustazdyq – uly mindet. Sondyqtan da ustazdardyń ulaǵatty oılaryn, sabaq ótý tásilin, bilim salasyndaǵy pikirlerin jarııalaǵan bas basylymnyń oqyrmany kóp. Eń bastysy bul elimizdiń ár qıyryndaǵy ustazdardyń bir-birimen tájirıbe almasýy úshin óte qajet dúnıe», dedi F.Shortanbekova.
Sonymen qatar matematıka pániniń muǵalimi Murat Qaspaqov, qazaq tili men ádebıeti pániniń muǵalimi Qarlyǵash Erǵaraqyzy jáne geografııa pániniń muǵalimi Rahymjan Almanbetov bilim berýdiń jańa júıesi jáne gazettiń jańartylǵan mazmuny jóninde óz oılaryn aıtty.
Hamıt ESAMAN, «Egemen Qazaqstan»
Jambyl oblysy