Almatyda kóshelerge Kenesery han, Ázilhan Nurshaıyqov, Jumeken Nájimedenov, Qadyr Myrza Álı, Tumanbaı Moldaǵalıev, Shyńǵys Aıtmatov, Gerold Belger, Talǵat Bıgeldınov, Ermek Serkebaev, Sháken Nııazbekov syndy qazaq tarıhy, ádebıeti, mádenıetine eńbegi sińgen tanymal tulǵalardyń esimderi beriledi, dep habarlaıdy Almaty ákimdiginiń baspasóz qyzmeti.
«Sh.Aıtmatov, G.Belger, T.Bıgeldınov, E.Serkebaev, Q.Kenjetaev, S.Kalmykov, Q.Myrza Álı, Almaty aportynyń «ákesi» atanǵan E.Redko jáne basqalardyń esimderin alǵan kósheler paıda bolady», delingen ákimdik habarlamasynda. Osylaısha Megapolıste 42 kóshege elimizdiń damýyna úles qosqan qaıratkerler esimi jáne geografııalyq ataýǵa, qazaqstannyń tarıhy men mádenıetine, dástúrine oraı atalatyn bolady.
Eske salsaq, Almatyda buryndary birin-biri qaıtalaıtyn 100 kóshe ataýy ózgergen bolatyn. Qalaǵa qosylǵan eldi mekenderdi eseptegende megapolıste Abaı atynda - 12. M. Áýezov atynda - 3, J. Jabaev atynda - 13, Qurmanǵazy atynda - 6, Tóle bı atynda - 5, Qazybek bı atynda - 3, Áıteke bı atynda - 3, Raıymbek batyr atynda - 8, Naýryzbaı batyr atynda - 4, Qarasaı batyr atynda - 8, Baıtursynov atynda - 4, S. Seıfýllın atynda - 5, Á. Moldaǵulova atynda - 6, M. Mámetova atynda 6 kóshe atalǵan eken.
Qalalyq ákimdiktiń habarlaýynsha memlekettik organdar bazada kóshe ataýy ózgergen soń qajetti anyqtamalardy elektrondy úkimet portalynyn nemese HQKO-dan birneshe mınýt ishinde ala alady.
Sonymen birge búgin, 30 qarashada Almatydaǵy Fýrmanov kóshesi Nazarbaev dańǵyly bolyp ózgertilgen bolatyn.