Mańǵystaý oblysy Ishki Ister departamentiniń májilis zalynda Qazaqstan Respýblıkasynyń Tuńǵysh Prezıdenti kúnine arnalǵan saltanatty shara ótkizildi.
Mereke kezinde májilis zalynda Elbasynyń ómiri men qyzmetine arnalǵan fotokórmeler, stendter qoıyldy. Qatysýshylardyń nazaryna «Elin súıgen Elbasy» taqyrybynda qysqasha beınesıýjetti kórsetilim kórsetildi. Sharaǵa Ishki ister departamentiniń barlyq jeke quramy qatysty.
Merekelik sharanyń aldynda Qazaqstan Respýblıkasynyń Memlekettik týy ákelinip, Gımni aıtyldy.
Alǵash quttyqtaý sózdi alǵan Mańǵystaý oblysy Ishki ister departamentiniń bastyǵynyń orynbasary polısııa polkovnıgi Bóken Begeruly Jumaǵalı «bizdiń babalarymyz ǵasyrlar boıy ushqan qustyń qanaty talyp, júgirgen ańnyń tuıaǵy tozatyn ulan-ǵaıyr aýmaqty ǵana qorǵaǵan joq. Olar ulttyń bolashaǵyn, keler urpaǵyn, bizdi qorǵady. San taraptan suqtanǵan jurtqa atamekenniń qarys qadamyn da bermeı, urpaǵyna mıras etti»,-degen Elbasynyń sózin keltire otyryp, ishki ister organdarynda qyzmet etýdegi basty maqsat - Qazaqstan derbes memleket bolyp, táýelsizdigin jarııalaǵan sátten bastap onyń tynyshtyǵyn qorǵaýǵa berik den qoıylyp, tártip saqshylarynyń erlik isterin keıingi urpaqqa jetkizip, úlgi etý, ulttyq qundylyqtarymyzdy saqtaý bolyp jalǵasyp kele jatqanyn atap ótti. Ishki ister organdary qyzmetkerleriniń azamattardyń bostandyqtary men konstıtýsııalyq quqyqtaryn qorǵaý jolyndaǵy qyzmetterine sáttilik tiledi. Sonymen qatar, «Tuńǵysh Prezıdent kúnine» arnalǵan merekelik shara aıasynda óz qyzmetterin minsiz atqarǵan tártip saqshylary da marapattan tys qalmady. Tártip saqshylaryn marapattaý rásimi Departamenttiń Kadr jumysy basqarmasy bastyǵynyń orynbasary polısııa polkovnıgi Muhtar Qanǵalıuly Sadaqbaevqa tabystaldy.Tártip saqshylaryn marapattaý barysynda júrekterine jalyn, Otanǵa adal qyzmet etýlerine tilek bildirdi.
Kelesi sóz kezegi Mańǵystaý oblysy boıynsha «Dınamo» DShSQ tóraǵasynyń orynbasary Igor Nıkolaevıch Sadykınge berildi. Igor Nıkolaevıch Elbasynyń syndarly saıasatynyń arqasynda ishki ister organdarynda qyzmet etetin sport maıtalmandarynyń túrli respýblıkalyq saıystarǵa qatysý múmkindigine qol jetkizip, júldelermen oralyp júrgendigin maqtanyshpen jetkizdi.
Polısııa qyzmetkerleriniń oblys kóleminde quqyqtyq tártip pen zańdylyqty nyǵaıtý, qylmyspen kúreste, krımınogendik ahýaldy turaqtandyrýǵa qosyp jatqan úlesteri mol. El bolashaǵy úshin eńseli eńbek etip, mereıli jeńisterge jete berińizder,- dep aıaqtady sózin Ardagerler keńesiniń tóraǵasy Naǵashybaı Omaruly Jarıev.
Shara sońy ádemi ánder men áýezdi kúılerge ulasyp, qatysýshylar elimizdiń Tuńǵysh Prezıdenti Nursultan Ábishuly Nazarbaevtyń ómiri men eńbek joldaryn baıandaıtyn shyǵarmalarymen tanysty., dep habarlady redaksııa tilshisine IID qyzmetkeri Ardaqhan Náýbetova.
Gúlaıym ShYNTEMIRQYZY, «Egemen Qazaqstan».
Mańǵystaý oblysy