Búgin Úkimet úıinde Astanada 5 jeltoqsanda bastalatyn «Kazakhstan Global Investment Roundtable» forýmy aıasynda QR Premer-Mınıstri Baqytjan Saǵyntaev Cathay Industrial Biotech kompanııasynyń prezıdenti Lıý Shıkaımen, Areva Mines kompanııasynyń basqarýshy dırektory Jak Pıtemen jáne CNBC arnasynda «STREET SIGNS» baǵdarlamasyn birlesip jazǵan avtor Orıel Morrısonmen birqatar ekijaqty kezdesýler ótkizdi.
Kezdesý barysynda yntymaqtastyqty odan ári nyǵaıtý jáne ındýstrııalandyrý jáne atom ónerkásibi salasynda jańa ınvestısııalyq jobalardy iske asyrý máseleleri talqylandy, dep habarlaıdy Úkimettiń baspasóz qyzmeti.
Aıta keteıik, Cathay Industrial Biotech kompanııasy 1997 jyly qurylǵan. Qazaqstanda kompanııa bıohımııalyq klaster qurý jáne modıfıkasııalanǵan talshyqtardy tolyq kólemde óndirýdi uıymdastyrý máselelerin qarastyrady. Jobany júzege asyrýǵa qajetti barlyq bes óndiristik sıkl júzege asqan jaǵdaıda, ınvestısııa kólemi shamamen $10 mlrd quraıdy jáne 10 myńǵa jýyq jumys ornyn ashýǵa múmkindik bolady.
Areva kompanııasy bolsa Fransııadaǵy atom ónerkásibi kóshbasshylarynyń biri, fransýzdyń iri óndiristik kompanııasy. 2016 jyldyń jazyna deıin ıadrolyq energııa óndirýge qatysty barlyq qyzmet túrine qatysqan jalǵyz batys kompanııasy. Ol, sondaı-aq, balamaly kózderden elektr energııasyn óndirýge arnalǵan jabdyqty ázirleýmen jáne ony shyǵarýmen aınalysqan.
Al Orıel Morrıson — Avstralııanyń eń tabysty bıznes jýrnalısteriniń biri, bıznes jáne qarjy jańalyqtaryn júrgizýden on jylǵa jýyq tájirıbesi bar.