Jýyrda Chelıabi qalasynda ótken HIV óńiraralyq yntymaqtastyq forýmynda sóılegen sózderinde Reseı jáne Qazaqstan prezıdentteri shekaralyq áriptestikti odan ári damytýdyń mańyzdy perspektıvalaryna toqtalyp, ózara birlesken is-qımyl arqyly tabystarǵa jetý múmkindikterine nazar aýdarǵan bolatyn. Onyń ishinde saýda-sattyq baılanysyna erekshe basymdyq berilgen edi.
Soltústik Qazaqstan kórshi eldiń úsh oblysymen shektesetin óńir bolǵandyqtan, qos tarap arasyndaǵy ekonomıkalyq qarym-qatynas óz jemisin berip keledi. Sońǵy bes jylda birlesken kásiporyndar sany 40 paıyzǵa kóbeıip, bir jylda 20 mıllıard teńgeniń salyǵy quıylǵan. Teriskeıdiń esh qospasyz, ekologııalyq jaǵynan taza ónimderin kórshilerimiz talasa-tarmasa satyp alatynyn shekaranyń arǵy jaǵynda ótkizilip júrgen aýylsharýashylyq jármeńkeleri de aıǵaqtaıdy.
Jýyrda Omby qalasynda «Qazmarket» atty saýda núktesi óz esigin aıqara ashyp, tutynýshylarǵa et, sút, kondıter taǵamdaryn usyndy. Omby oblystyq ekonomıka mınıstriniń orynbasary Denıs Kýshnerdiń aıtýynsha, Soltústik Qazaqstan oblysy negizgi áriptesi sanalady. Syrtqy saýda úlesi 30 paıyzdy quraıdy. Bıyl onyń kólemi 160 mıllıon dollarǵa jetken. Aldaǵy ýaqytta da azyq-túlik túrleri satylatyn saýda alańdary júıesin keńeıtý belgilengen.
Jaqsy jańalyqtyń izi sýymaı jatyp óńir basshysy Qumar Aqsaqalovtyń tapsyrmasymen taǵy bir saýda pavılony boı kóterdi. «Qazaqstanda jasalǵan» brendi shekaralas óńirlerde keńinen tanymal. Osy sebepti syrtqy naryq qajettilikterin óteýdiń joldary jan-jaqty oılastyrylǵan. Bul oraıda, taýarlardyń moldyǵy men sapasy barynsha eskerilgen. Biz osy jaǵyna úlken kóńil bólip otyrmyz», deıdi «Esil» aýmaqtyq damytý ortalyǵynyń dırektory Rýslan Sharıpov.
Munda soltústikqazaqstandyq taýar óndirýshiler óz ónimderin tikeleı, deldalsyz usynatyndyqtan baǵa qoljetimdi. Sórelerde suıyq maı, jartylaı fabrıkat, shujyq, qalbyrdaǵy et, jumsaq, qatty irimshik, shyryn, un, makaron, kondıterlik ónimder, taǵy basqa eki júzden astam ónim túri oryn alǵan. Ombydaǵy «Qazmarket» saýda jelileriniń jetekshisi Evgenıı Boıko Qazaqstanda shyǵarylatyn básekege qarymdy taýarlar men ónimderge suranystyń arta túskenin alǵa tartty. Onyń sózin turaqty tutynýshylardyń biri Vıktor Homenkov, Tatıana Pshanova da rastap, dámdiligi til úıiretin azyq-túlik taǵamdaryn birinshi kezekte satyp alatyndaryn jetkizdi.
Mundaı saýda núktelerin Túmen qalasynda da ashý uıǵarylǵan.
О́mir ESQALI, «Egemen Qazaqstan»
Soltústik Qazaqstan oblysy