Oralda 180 páterli jańa úı paı­dalanýǵa berildi

«Turǵynúıqurylysjınaq­banki» AQ sa­lymshylary men Oral qalasynda tur­ǵyn úı kezeginde turǵan jandarǵa berilgen 9 qabatty úı qurylysy «Nurly jer» baǵdarlamasy aıasynda salynǵan. Merdiger «Bolashaq-T» JShS – óńirde jańa tehnologııany ıgerip, úı kombınaty arqyly paneldi turǵyn úı qurylysyn júrgizip bastaǵan kompanııa. Nemis tehnologııasy boıynsha salynǵan bul úıler jylý únemdegish qasıetimen turǵyndardyń kóńilinen shyqqan.

– Bıyl bizdiń óńirde «Nurly jer» baǵdarlamasy boıynsha qalada 14 kóp qabatty úı, aýdan-aýyldarda 188 bir qabatty úı salynyp jatyr. Bul 1700 otbasy qonys toıyn toılaıdy degen sóz. Jyl sońyna deıin 1500 turǵyn jańa páterdiń kiltin qolyna ustaıdy. Mu­nyń barlyǵy táýelsizdiktiń, turaq­ty­lyqtyń, birligimizdiń arqasy. Elba­sy tapsyr­malarynyń ýaqytyly oryn­dal­ǵanynyń nátıjesi. О́zderińiz bilesizder, osydan birneshe jyl buryn dál osy jer bos jatqan dala bolatyn. Ara-tura at shaýyp, kókpar tartatyn jer edi ǵoı, – dedi jańa páterlerdiń kiltin tabystaǵan saltanatty jıynda Batys Qazaqstan oblysynyń ákimi Altaı Kólginov.

2017 jyly Oral qalasy boıynsha «Nurly jer» baǵdarlamasyn júzege asyrý barysynda 10 857,195 mln teńge bólingen eken. О́ńir basshysy Tur­ǵyn­úıqurylysjınaqbankiniń Ba­tys Qazaqstan oblysyndaǵy salymshylar sany 54 myńnan asqanyn aıtady. «Bul degen áli osynsha adam jańa pá­ter alýdy josparlap otyr degen sóz ǵoı. Onyń ústine qurylys búkil eko­no­mıkanyń lokomotıvi sııaqty. Úı salynsa, oǵan beton buıymdary kerek, kirpish kerek, esik-tereze kerek, plastık qubyrlar qajet, jıhaz kerek. Qansha adam qyzmet etedi, jalaqy alady. Qadirli jerlester, búgingi qýanysh, jańa baspanalaryńyz qutty bolsyn! Alda Táýelsizdik meıramy da kele jatyr. Ol kezde de qalamyzda birqatar nysandar ashylady. Mereke qutty bolsyn!» degen oblys ákimi jańa páter ıelerine kiltterdi tabys etti.

Kenjegúl Qamyspaeva Turǵyn­úı­qu­rylysjınaqbankinen osy­dan úsh jyl buryn esepshot ashqan eken. О́zi Shyńǵyrlaý aýdany Aq­shat eldi mekenindegi aýyl mek­tebinde tarıh pániniń muǵalimi.

– Konkýrstan eń aldymen ótippin. Úsh jyldan beri qarjy salyp, mine, bú­gin bir bólmeli páterge qolym jetip otyr. Buıyrsa, qalaǵa kóship kele­min degen josparym bar, – deıdi Kenje­gúl. Kópten kútken páteri bıik úıdiń ekin­shi qabatynan buıyrǵanyna dán rıza.

Aıta keteıik, bıylǵy Tuńǵysh Prezı­dent kúni Terekti aýdanynyń Pods­tepnoe aýyly turǵyndarynyń da esinde qalatyn boldy. Oral qalasynyń irgesinde turǵan, erterekte Minánáı atanǵan eldi mekende 10 myńnan asa adam turady. Osy aýylda kópten beri mədenıet oshaǵy salynbaǵan eken. Halyqtyń suranysyna oraı «Nurly jol» baǵdarlamasy aıasynda qarjy bólinip, merdiger «Altaır» JShS eki qabatty Mádenıet úıiniń qurylysyn ýaqytynan erte bitiripti. Qurylysqa jergilikti bıýdjetten 319 mln 628 myń teńge qarjy jumsalyp, 50 adam eńbek etken. 300 oryndyq kórermen zaly bar bul mádenı oshaqta bes úıirme ashylyp, jergilikti balalardy ártúrli ónerge baýlıtyn bolady.

Dál osy kúni oblystyń Terekti, Bórli, Aqjaıyq aýdandarynda birqatar aýyl turǵyndary taza aýyz sý júıesin qoldanýǵa kóshti. Al Oral qalasynda №4 jáne №6 shaǵyn aýdandar arasynda jaıaý júrginshilerge arnalǵan ádemi saıabaqty jol paıdalanýǵa berildi.

«Bul bıyl qorytyndylanatyn jumystardyń sońy emes. Alda keletin elimizdiń eń ulyq merekesi – Táýelsizdik kúnine oraı da birqatar jańa nysandar iske qosylady», deıdi óńir basshysy Altaı Kólginov.

Qazbek QUTTYMURATULY, «Egemen Qazaqstan»