Kenesary hanǵa qatysty jádigerler boıynsha úlken kórme ótkizý úshin reseılik mýzeılermen kelissózder júrgizý kerek. Bundaı pikirdi «Qasıetti Qazaqstan» ǵylymı-zertteý ortalyǵynyń basshysy Berik Ábdiǵalıuly málimdedi, dep habarlady «QazAqparat».
«Jaqynda Reseıge barǵanda Kenesary hanǵa tıesili osy kiseni kórdik. Kenesary hannyń myltyǵy Ombyda saqtaýly turǵany málimet boldy. Sondyqtan reseılik mýzeıler Kenesaryǵa baılanysty Qazaqstanda kórme ótkizse, óte jaqsy bolar edi. Iаǵnı basqa da tulǵalarǵa qatysty jádigerlerdi ákelip tursa, buny jaqsy bastama dep baǵalar edik», - dedi ol.
Aıta keteıik, búgin Berik Ábdiǵalıuly Feısbýktegi paraqshasynda Sankt-Peterbýrgte Kenesary hannyń kisesi saqtalǵany anyqtalǵanyn jazdy.
«Alash áskeri taqyrybyn zerttep júrip, Seıilbek Janaıdarovtyń 1915 jyly Sankt-Peterbýrgtegi Reseı etnografııalyq mýzeıine Kenesary hannyń kisesin tapsyrǵany týraly derek kezdestirdim. Bul jádiger «Kse - poıas kırgızskogo hana Sredneı Ordy» degen atpen atalǵan mýzeıdiń qorynda búgingi kúnge deıin saqtalǵan eken. Ony Mádenıet jáne sport mınıstri Arystanbek Muhamedıulymen Sankt-Peterbýrgtegi mýzeıge barǵanda óz kózimizben kórýge múmkinshiligi týdy», - dep jazdy áleýmettik jelide ol.
Osy oraıda ol Seıilbek Janaıdarov 1918 jyly Atbasar Alash áskerı dıvızıonyn qurǵan ári Alashorda úkimetiniń kandıdat múshesi bolǵan azamat ekenin eske salyp ótti.
«Bul jádiger Seıilbek Janaıdarovtyń qolyna qalaı túskenin zertteı kele anyqtaǵanymyz - ol kise Seıilbektiń atasy - Kenesary hannyń áskerı qolbasshylarynyń biri Janaıdar Orynbaıulynan qalǵan mura eken. Janaıdar batyrdyń erlikteri týraly Musa Shormanovtyń, Máshhúr Júsiptiń, Doskeı aqynnyń, Jambyldyń, Imanjan Jylqaıdarulynyń estelikteri men jyrlarynda kezdesedi. Sondaı-aq bul týraly I.Esenberlınniń «Qahar» romanynda da jazylǵan. Batyrdyń urpaqtarynyń aıtýynsha, Kenesary han ózin ólimnen birneshe ret qorǵap qalǵany úshin ári kórsetken erlikteri úshin atalǵan kiseni Janaıdar Orynbaıulyna tartý etken. Jalpy Kenesary óz batyrlaryna soǵysta kórsetken erlikteri úshin orden-medal ornyna alǵys retinde úlken syı-sııapatpen marapattaý dástúri bolǵan. Sondaı-aq Kókshetaý shaıqasynda jeńiske jetkeni jáne shynaıy erjúrektik kórsetkeni úshin Kenesary Aǵybaı batyrǵa atasy Abylaı hannan qalǵan qanjardy tartý etken eken. Bul týraly aqparatty jaqyn arada tolyǵyraq kórsetemin»,- dep jazdy Berik Ábdiǵalıuly.