Búgin Qazaqstan Respýblıkasynyń Úkimeti taǵaıyndaǵan «Daryn» memlekettik jastar syılyǵynyń laýreattaryn saltanatty túrde marapattaý rásimi ótti, dep habarlaıdy QazAqparat.
«Elbasy aıtqandaı daryndy jastar - ol elimizdiń bolashaǵy jáne áleýeti. Jastar máselesi, saıasaty, olardy jumys oryndarymen qamtamasyz etý, jastardyń áleýetin ashý, talantyn kórsetýge múmkinshilik jasaý árqashan da Elbasynyń jáne el Úkimetiniń nazarynda. «Daryn» syılyǵy buryn eki jylda bir ret berilgen bolsa, bıylǵy jyldan bastap jyl saıyn beriletin bolady. Ol da barlyǵymyzdyń ortaq jetistigimiz dep oılaımyn. Onyń ústine ol memlekettiń jáne Úkimettiń jastarǵa nazar aýdarýynyń kórinisi», - dedi syılyq ıelerin marapattaý rásiminde Qazaqstan Respýblıkasy Din isteri jáne azamattyq qoǵam mınıstri Nurlan Ermekbaev.
Syılyq 10 nomınasııa boıynsha - ádebıet, ǵylym, beıneleý óneri, jýrnalıstıka, klassıkalyq mýzyka, qoǵamdyq qyzmet, sport, teatr jáne kıno, estradalyq óner, halyq shyǵarmashylyǵy salasynda úzdik dep tanylǵan jastarǵa tabystaldy. Osylaısha, «Sport» nomınasııasy boıynsha qazaqstandyq mánerlep syrǵanaýshy Denıs Ten jáne áıelder arasyndaǵy halyqaralyq grossmeıster, tórt dúrkin álem chempıony Dınara Sádýaqasova jeńimpaz dep tanyldy. «Estrada» nomınasııasy boıynsha qazaq estradasynyń ánshisi Serik Ibragımov pen Qazaq ulttyq óner ýnıversıtetiniń stýdenti Rústem Jýginisov marapatqa ıe boldy.
«Klassıkalyq mýzyka» nomınasııasy boıynsha «Young Eurasian Soloists» kameralyq orkestriniń solısi Shernııaz Musahan men «Astana Opera» Ulttyq opera jáne balet teatrynyń ánshisi Marııa Mýdrıak «Daryn» syılyǵyn ıelendi. «Halyq shyǵarmashylyǵy» nomınasııa boıynsha aıtysker aqyn Syrym Áýezhan jáne Qazaq ulttyq óner ýnıversıtetiniń oqytýshysy Dáýlethan Sartaı marapattaldy. «Ádebıet» nomınasııasynda aqyn Dınara Málikova, «Aq jol» demokratııalyq partııasynyń ıdeologııalyq jumysy bóliminiń keńesshisi Eldos Toqtarbaevtyń eńbegi úzdik dep tanyldy.
«Teatr jáne kıno» nomınasııasy boıynsha G.Músirepov atyndaǵy qazaq memlekettik akademııalyq balalar men jasóspirimder teatrynyń aktrısasy Dınara Abdýllına jáne «Astana Opera» memlekettik opera jáne balet teatrynyń balet trýppasynyń jetekshi solısti Baqtııar Adamjan «Daryn» syılyǵynyń laýreattary atandy. «Jýrnalıstıka» nomınasııasy boıynsha Atameken Business Channel arnasynyń «Basty taqyryp» baǵdarlamasynyń júrgizýshisi Erbolat Muhamedjanov jáne «Respýblıkalyq radıo» JShS jańalyqtar qyzmetiniń redaktor-júrgizýshisi Álibek Ábdilov jeńis tuǵyrynan kórine bildi.
«Dızaın jáne beıneleý óneri» nomınasııasy boıynsha «Daryn» syılyǵy Qazaq ulttyq óner ýnıversıtetiniń stýdenti Nurbolat Asqar men Abaı atyndaǵy Jambyl gýmanıtarlyq kolledjiniń oqytýshysy, ári oń qolynan óner tamǵan zerger Halıev Berik Jumaǵalıulyna berildi. «Qoǵamdyq qyzmet» nomınasııasy boıynsha «Daryn» syılyǵy «Jas Otan» jastar qanatynyń hatshylyǵynyń basshysy Dáýlet Káribekke jáne Atyraý oblysyndaǵy «Qazaqstan-2050» jalpyulttyq qozǵalysynyń uıymdastyrýshysy Ilııas Qonysbaevqa tabystaldy. «Ǵylym» nomınasııasy boıynsha Qorqyt Ata atyndaǵy Qyzylorda memlekettik ýnıversıtetiniń jetekshi mamany Nurǵalı Aqylbekov, sondaı-aq L.N.Gýmılev atyndaǵy EUÝ-niń ǵylymı toby -Ilıa Korolkova jáne Dmıtrııa Shlımas úzdik dep tanyldy. Barlyq jeńimpazdarǵa Qazaqstan Respýblıkasy Úkimetiniń qaýlysymen «2017 jylǵy Daryn memlekettik jastar syılyǵynyń laýreaty» ataǵy berildi, jáne olar dıplommen, tósbelgimen jáne aqshalaı syılyqtarmen marapattaldy.