Sońǵy jyldary elimizde qyzdar boksy da qarqyndy damyp keledi. Oǵan burymdylarymyzdyń Olımpııa oıyndary, álem jáne Azııa chempıonatynda alǵan júldeleri dálel. Solardyń qatarynda astanalyq boksshy Rımma Volosenko da bar. Jaqynda ol munaıly elder arasynda ótken bokstan álem kýbogynda top jardy. Osyǵan oraı, Rımmany júldesimen quttyqtap, az-kem áńgimeleskendi jón kórdik.
– Rımma, suraǵymyzdy jýyrda ǵana aıaqtalǵan Azııa chempıonatynan bastasaq. Saryqurlyq birinshiligine qansha ýaqyt daıyndaldyńyzdar?
– Azııa chempıonatyna joǵary deńgeıde barý úshin óte uzaq ýaqyt ári tynymsyz daıyndaldyq. Áýeli Qytaıda sol eldiń boksshylarymen birge oqý-jattyǵý jıynyna qatysyp, sparrıngtik kezdesýler ótkizdik. Sebebi Azııadaǵy bizdiń basty qarsylastarymyz osy Qytaı boksshylary. Al jalpy fızıkalyq daıyndyǵymyzdy Almatydaǵy AIBA boks akademııasynda shyńdadyq. Chempıonatqa sońǵy daıyndyǵymyzdy Astanada pysyqtap, Vetnamǵa sapar shektik. Qurama boksshylary Vetnamǵa óte joǵary daıyndyqpen bardy dep aıta alamyn.
– Azııa chempıonatyndaǵy alǵashqy kezdesýińizde ońtústikkoreıalyq qarsylasyńyzdan teń dárejede ótken kezdesýde jeńilip qaldyńyz. Tóreshiler sizge qııanat jasady dep oılamaısyz ba?
– Jalpy, boksta mynadaı sóz bar. Eger tóreshi rıngte seniń qolyńdy kótermese, onda sen jeńilgenińdi moıyndaýyń kerek. Sondyqtan tóreshiler týraly eshteńe aıta almaımyn. Sport osynysymen qyzyq. Birde jeńesiń, birde jeńilesiń. Al men osy kezdesýden keıin jibergen qatelikterimmen jumys isteý, kelesi básekelerde jeńiske jetý úshin daıyndyǵymdy eki ese arttyrý kerek ekenin túsindim.
– Kezdesýden soń sizge ulttyq qurama bapkerleri ne aıtty?
– Árıne, bul jeńilis men úshin de, jattyqtyrýshylar úshin de ońaıǵa soqpady. Azııa chempıonatyna tek altyn medal alyp, elimizdiń Ánuranyn shyrqatamyn dep baryp edim. Degenmen, bapkerlerim jekpe-jek kóńilderinen shyqqandaryn, eńsemdi túsirmeı, aldaǵy ýaqytta kóp jattyǵý kerektigin aıtty.
– Jalpy, sporttyń bul túrine qalaı keldińiz? Bokspen shuǵyldaný qyzdarǵa qıyn emes pe?
– Boks maǵan bala kezimnen unaıtyn. Ákem ekeýmiz teledıdardan únemi kásipqoı bokstyń jekpe-jekterin tamashalaıtynbyz. Sóıtip meniń boksqa degen qyzyǵýshylyǵym artyp, boks úıirmesine jazylýǵa nıettendim. Alaıda aýylymyzda tek voleıbol seksııasy ǵana bar edi. Qalaǵa kelgenge deıin voleıbol sportymen aınalystym. Keıinnen, kolledjge oqýǵa túsip, boks zalyna jazyldym. Mine, sol ýaqyttan beri boksty janyma serik etip kelemin. Menińshe, boks sporty qyzdarǵa qıyn emes sııaqty (kúlip).
– Sizdiń pikirińizshe, elimizde qyzdar boksynyń deńgeıi qaı dárejede?
– Qazaqstanda qyzdar boksynyń deńgeıi óte joǵary. Erler dárejesine jetpesek te, soǵan jeteǵabyl dep esepteımin. О́ıtkeni qazirgi ulttyq quramada júrgen boksshy qyzdardyń arasynda halyqaralyq dárejedegi, Qazaqstan Respýblıkasyna eńbegi sińgen sport sheberleri óte kóp. Sondaı-aq birneshe dúrkin álem jáne Azııa chempıondary, Olımpııa oıyndarynyń júldegerleri de bar. Qazirgi tańda bokstan Qazaqstan qyzdar quramasy álemniń kez kelgen quramasyna laıyqty qarsylyq kórsetetinin jáne olar da bizdiń boksshylarmen sanasatynyn senimmen aıta alamyn.
– Kelesi jyly qandaı iri dodalarǵa daıyndalyp jatyrsyz?
– Azııa chempıonatynan soń ulttyq qurama bapkerleri jańa jylǵa deıin demalys bergen bolatyn. Biraq kúndelikti jattyǵý zalyna baryp júrmin. Al qańtar aıynda tolyq jattyǵýǵa kirisip, el birinshiligine daıyndalatyn bolamyz. Qazaqstan chempıonatynan keıin 2018 jylǵy Azııa oıyndaryna jáne álem birinshiligine kimder baratyny anyqtalady. Buıyrsa, el chempıonatynda top jaryp, halyqaralyq jarystarǵa qatysyp qana qoımaı, elime júlde ákelgim keledi.
– Karerańyzdaǵy eń jarqyn jeńisińiz qaısy?
– Azııa chempıonatynan keıin jeke bapkerim Berik Marjyqpaevpen birge Reseıdiń Beloıarsk qalasynda munaıly elder arasynda ótken álem kýbogyna qatysyp, top jardym. Osy jeńisim arqyly halyqaralyq dárejedegi sport sheberi atandym. Kareramdaǵy eń jarqyn jeńisim dep, osy jetistigimdi aıtar edim. Bul jeńisti eshqashan umytpaımyn. Munaıly elder arasyndaǵy jarysta buryn Qazaqstannan Marına Volnova ǵana jeńgen bolatyn. Endi, men de munaıly ólkeniń chempıony boldym. Azııa chempıonatyndaǵy sátsizdigimnen keıin jeke bapkerim Berik Marjyqbaev meni birden osy jarysqa daıyndady. Ol kisi tek bapkerim emes, aqylshym ári janashyrym. Osy oraıda meni osyndaı dárejege jetkizgen Berik Boranbaıulyna óz alǵysymdy aıtamyn.
– Qazirgi tańda erlermen qatar qyzdar da dendep kásipqoı boksqa aýysyp jatyr. Sizde kásipqoı boksqa aýysý nıeti joq pa?
– Shynynda da, qyzdar arasyndaǵy kásipqoı boks ta qarqyndy damyp keledi. Degenmen, kásipqoı boksqa aýysý týraly áli oılanyp kórmeppin. Meniń qazirgi basty armanym – Olımpıada chempıony ataný. Tokıo Olımpıadasyna baryp, elimizge altyn medal ákelgim keledi.
Áńgimelesken
Álı QUDIIаRULY