Ispanııanyń «Real Madrıd» fýtbol klýby men Portýgalııa ulttyq quramasynyń shabýylshysy Krıshtıaný Ronaldý besinshi márte «Altyn dop» ıegeri atandy. 32 jastaǵy oıynshy bul ataqqa osyǵan deıin 2008, 2013, 2014 jáne 2016 jyldary qol jetkizgen bolatyn. «Altyn dop» sany boıynsha ol endi «Barselona» jáne Argentına quramasynyń shabýylshysy Lıonel Messımen teńesti.
Krıshtıaný Ronaldý bıyl «Real Madrıd» komandasymen birge Ispanııa chempıony atanyp, Chempıondar lıgasynda eki jyl qatarynan top jardy. Sondaı-aq ÝEFA Sýperkýbogi men Ispanııa Sýperkýbogine qol jetkizdi. Ronaldý – madrıdtikter sapynda 44 oıynǵa qatysqan, 38 goldyń jáne 9 nátıjeli pastyń avtory. Al Chempıondar lıgasynyń ótken maýsymynda 12 gol salyp, úzdik surmergender tiziminde kósh bastaǵan bolatyn.
Fýtboldan 2018 jylǵy álem chempıonatyna irikteý kezeńde Portýgalııa ulttyq quramasy «V» tobynda synǵa túsip, óz tobynda birinshi orynmen kelesi jylǵy álem birinshiligine joldama aldy. Ronaldý qurama sapynda bıyl 11 oıynda 11 gol soǵyp, áriptesterine tórt nátıjeli pas berdi.
«Real Madrıd» shabýylshysy bıyl ÝEFA nusqasy boıynsha Eýropanyń úzdik oıynshysy atanǵan edi. Aıta keterlik taǵy bir jaıt, osy maýsymda Ronaldý Chempıondar lıgasynda kezekti ret rekord jańartty. Ol toptyq kezeńdegi alty kezdesýdiń bárinde gol soqqan alǵashqy oıynshy.
Eske sala keteıik, «Altyn dop» júldesin 2016 jyldan bastap France Football basylymy qaıta tabystady. Al 2009-2015 jyldary bul FIFA-nyń quzyretinde bolǵan edi. France Football úzdik oıynshyny sport jýrnalısteriniń daýys berýi arqyly anyqtaıdy.
«Egemen-aqparat»