Oral qalasynda halyq ártisi, Halyq qaharmany Roza Baǵlanovany eske alý keshi ótti. О́ner juldyzyn eske alý keshine belgili ánshiler – Qazaqstannyń eńbek sińirgen qaıratkeri Baqyt Shadaeva men halyqaralyq baıqaýlardyń júldegeri Gaýhar Qaspaqova arnaıy keldi.
– Roza Baǵlanova apamyz 90 jasyna 10 aı ǵana jetpeı ómirden ótti. Qazaq jurtyna ǵana emes, KSRO atalǵan alyp memleketke tanymal bolǵan áıgili ánshi baqytty ǵumyr súrdi dep aıta alamyn. Roza apamyzdyń janynda 24 jyl birge júrip, kómekshi boldym. Barmaǵan jerim, baspaǵan taýym bolmady, apamnyń arqasynda talaı-talaı azamatpen etene bolyp kettim. «Baqyt degen ne?» dese, baqytty adamdardyń qasynda júrip, qyzmet etý der edim, – deıdi osy keshti uıymdastyrýshy, Qazaqstan Respýblıkasynyń mádenıet qyzmetkeri Qýanysh Ábdiqalymov aǵynan jarylyp.
Eske alý keshinde kórermender áıgili ánshi týraly derekti fılmdi tamashalap, estelikter tyńdady. Ǵarıfolla Qurmanǵalıev atyndaǵy Batys Qazaqstan oblystyq fılarmonııasynyń janynan qurylǵan «Oral sazy» folklorlyq ansambli sahnaǵa shyǵyp, óner kórsetti.
– Bıyl Roza Baǵlanovanyń týǵanyna 95 jyl tolyp otyr. Osyǵan oraı elimizdiń birqatar oblysynda osyndaı eske alý keshterin uıymdastyrdyq. Qorytyndy sharany keler jyldyń basynda Astanada ótkizbekpiz. Qudaıǵa shúkir, apamyz kózi tirisinde ózi qurǵan «Altyn saqa» qaıyrymdylyq qory áli qyzmet etip jatyr. Jetim, múgedek balalarǵa, soǵys ardagerlerine kómek kórsetemiz. Almaty qalasynda Roza Baǵlanovanyń atyna kóshe berildi. Mundaı qurmet Astana qalasynda da kórsetiledi dep kútip otyrmyz. Osy keshti uıymdastyrýǵa demeýshilik kórsetken «Eır Astana» áýe kompanııasyna alǵysym sheksiz, – deıdi ánshiniń prodıýseri Qýanysh О́teshuly.
Qazbek QUTTYMURATULY,
«Egemen Qazaqstan»
ORAL
Sýretti túsirgen
Aıbatyr NURASh