Asýdaǵy jol kóktaıǵaq. Ne qum, ne tuz sebilmegen. Aınadaı bop, jaltyrap jatyr. Qaýsaǵan eski mashınanyń taýǵa qaraı qalaı órlep kele jatqanyna qaıran qalasyń.
Keýdesi sadaqsha ıilip, rólge jabysa túsken Rásh kókemniń basyna dál qazir qasymda bir tiri jan otyr eken-aý degen oı kirip te shyqpaıdy. Bar zeıini jolda. О́lsem de, tirilsem de myna asýdan qalaıda ótýim kerek dep ózine ózi sert bergen sekildi.
Juqaltań júzi kúreńitip, ánsheıinde jypylyqtaı beretin shúńirek kózi bir núktege qadalǵan kúıi tesile qalǵan.
Jazdygúni bastyqtyń keńseden shyǵýyn kútip, yp-ystyq kabınada byrshyp terlep, aqsary júzi qyp-qyzyl bop, áldeqaıdan yzyńdap ushyp kelgen kók shybyndy balaǵattap, baıa-shaıa bolyp otyratyn ushqalaq Rásh bul emes sııaqty. Qazir múlde basqa adam.
Aldyńǵy jaqtan «KamAZ» kórindi. Taý basynan bir óńkıgen dáý adam taıǵanaqtap, ázer túsip kele jatqandaı demimizdi ishimizge tartyp, apyr-aı, myna mundar bizdi abaısyzda janshyp ketpese netti dep, tynysymyz taryla bastady.
Jo-joq. Bizdiń Rásh ta, álgi «KamAZ»-dyń rólinde otyrǵan beıtanys shopyr da myqty eken. Áne-mine súzisip qala jazdap, bir-birin búıirden nuqyp kete jazdap baryp, áýpirimmen óte shyqty-aý, áıteýir.
Mine, osydan soń asýdyń ústine kóterilgen shyǵarmyz-aq dep em, sóıtsem... sup-sýyq, sup-sur jylan sekildi jyltyraǵan kóktaıǵaqtyń quıryǵy shubatylyp, kóz ushyna deıin sozyla beredi eken.
Túý, ne degen uzaq, qaterli jol.
Al mynaý Rásh bolsa, sol baıaǵy ún-túnsiz, tym-tyrys kúıinde kirpigin de qaqpaı, alǵa qarap, qadalyp otyr.
Osy sátte meniń kókeıimde: «Eger ol óz boıyndaǵy osy bir tunshyǵyp jatqan tylsym kúshti kúndelikti tirshilikte aıanbaı paıdalansa, apyr-aı, myna ómirdiń san alýan synaqtarynan qınalmaı ótip, bas aınalardaı bıikterge kóteriler edi-aý!» degen oı jylt ete qaldy.
Kóktaıǵaq joldyń myna bir tusy quzǵa tym jaqyn eken. Qylkópir sekildi qaltyldap, janymyzdy murnymyzdyń ushyna taqap tur. Tynysym tarylyp, kózimdi tars juma qoıdym.
Ýh!..
Budan da óttik-aý, áıteýir. Endi mine, bıikke qarasań da, tómenge kóz salsań da úreıiń ushatyndaı bir qyzyq deńgeıdemiz. Bar úmit ortada qalǵan sekildi.
Bul ózi, bizdiń tap búgingi tirshiligimizge uqsaıtyn jaıt emes pe osy, a?.. Kim biledi... Bizdiń de bıikke shyqqymyz keledi. Biraq, qulap ketemiz be degen qaýpimiz taǵy bar...
Mine, asýdyń ústine de jettik. Ráshtiń qabaǵy tez jazylyp, samaıynan sorǵalaǵan aıǵyz-aıǵyz terdi alaqanymen bir sylyp tastady da: «О́ı, ákeń... ólip qala jazdadyq qoı!» dep yrjıyp kúldi.
Sol sátte jańaǵy azap ta, synaq ta, erlik te umytylyp, aqsha qar jamylǵan alyp keńistikke sińip, ǵaıyp boldy.
Ol da, men de úırenshikti tirshiligimizge qaıta oralyp, shyrkóbelek aınalyp bara jattyq.
Nurǵalı ORAZ,
«Egemen Qazaqstan»