Elorda turǵyndary úshin umytylmas keshti Qazaqstan Respýblıkasy Ulttyq akademııalyq kitaphanasynyń ujymy uıymdastyryp otyr.
Aıtýly sharanyń «ádebı-sazdy» dep atalýy da tegin emes. «Qazaqstan» konsert zalynyń záýlim ári keń foıesine kitaphana ujymy «Rýhanı jańǵyrý» baǵdarlamasymen úndes oqýlyqtardyń kórmesin ótkizdi. Otandyq ári álemge tanymal aqyndar men jazýshylardyń úzdik týyndylarymen birge, jınalǵan qaýym ótken ǵasyrdyń 30-40 jyldarynda latyn álipbıinde jaryqqa shyqqan kitaptarmen tanysýǵa múmkindik aldy. Uıymdastyrýshylardyń aıtýynsha, saltanatty dýmannyń basty maqsaty – jastardy mádenıet pen ónerge baýlı otyryp, mádenı jetistikterdi pash etý.
Elimizde birinshi ret ótken ádebı-sazdy kesh týraly aıta kele Úmithan Muńalbaeva sharaǵa daıyndyqtyń qyzý júrgenin atap ótti. «Biz jumystan keıin arnaıy jınalyp, daıyndyq jumystaryn júrgizdik. Sondyqtan osynaý lırıkalyq keshti uıymdastyryp otyrmyz. Áleýmettik jeli arqyly barlyq Astana turǵyndary men meımandary shaqyryldy. Meniń oıymsha, bizdiń mádenıet qyzmetkerleri bir sátke tynyǵyp, keshte kóńil kóterýge laıyqty», deıdi.
Ádebı-sazdy keshte elordamyzdyń ónerli jastary bı bılep, óleń oqyp, sahnalyq qoıylymdar qoıdy. Jas ónerpazdardy bir-birimen tanystyryp, jaqyndastyrý maqsaty iske asqandaı boldy. Keshten kóńildi qaıtqan qala turǵyndary úılerine qaıtyp bara jatqanda, Astana aspanyn áli óleń terbep turǵan bolatyn.
Baǵashar TURSYNBAIULY, «Egemen Qazaqstan» Sýretti túsirgen Erlan OMAR, «Egemen Qazaqstan»