El dıhandarynyń bıylǵy jetistigi bárimizdi qýantty. Aýa raıynyń qolaıly kezeńin tıimdi paıdalanǵan olar jatpaı-turmaı eńbektenip, astyqty tókpeı-shashpaı jınap aldy. Sóıtip halqymyzdy eń negizgi aspen tolyq qamtamasyz etip otyr. Biraq bizdiń qoǵamymyz nan jolynda mańdaıterin aıamaı tókken aýyl sharýashylyǵy mamandarynyń, mehanızatorlardyń, elevatorlar men dıirmen jumyskerleriniń, naýbaıshylar men nan ónimderin jaqsy saqtap, halyqqa jetkizetin satýshylardyń eńbekterin eskerip, olardyń jumysyn yntalandyra túsýde shorqaqtyq tanytýdamyz. Osyndaı boıkúıezdik jyldar boıy jalǵasyp keledi.
Sondyqtan Májilistegi Halyqtyq kommýnıster fraksııasy qoǵamnyń nanǵa degen solǵyn kózqarasyn joıyp, onyń qasıetine tereń boılaýdy arttyrý úshin «Nan kúnin» atap ótýdi usynyp, Premer-Mınıstrdiń orynbasary – Aýyl sharýashylyǵy mınıstri Asqar Myrzahmetovke usynys jasadyq. Ondaı merekeler damyǵan elderdiń birazynda bar. Mysaly, Italııa qyzanaq, Nıderland qyzǵaldaq pen irimshik, Germanııa syra kúnderin atap ótedi. Bul tamaq ónimderi osy elderdiń maqtanyshy, ári kóp, ári joǵary sapada óndiriledi. Sol sııaqty bizdiń maqtanyshymyz – nan. Qazaqstan nanmen 100 mln adamdy bir jyl boıy qamtamasyz ete alady. Onyń sapasy da bizde birshama joǵary. Kóptegen shetelderge barǵanda ózimizdiń nanymyzdy saǵynyp kelemiz. Sondyqtan nanǵa aıryqsha qurmet retinde onyń kúnin belgilep, halyqqa qasıetin bildirip otyrǵannyń artyǵy bolmas edi. Atalarymyz ben apalarymyz ashtyq jyldarynda bir úzim nandy ańsap, oǵan jetýdi armandap ótken. Qazaq halqy da nandy astyń tóresi dep ejelden tórden oryn beredi.
«Nan kúnin» keńinen atap ótý – as tóresine degen qurmetti, onyń qadiri men qasıetin ósip kele jatqan urpaqtyń sanasyna sińirý úshin kerek. Qarny toıǵanda qolyndaǵy nanyn laqtyra salatyn baldyrǵandar onyń qasıetti as ekenin bilse mundaıdy jasamas edi. Sonymen birge osy kúni nan ónimderiniń kórmesin uıymdastyryp, baýyrsaq, taba nan, kúlshe, bólke, karavaı, toqashtardyń dámin halyqqa tattyrsa – olardyń sapasy týraly halyqtyń ózi de ańyz qylyp aıtatyn bolady. Osy kúni naýbaıshylar men tehnologtarǵa, nan sapasyn tekseretin medısına qyzmetkerlerine qurmet kórsetilse nur ústine nur. Sonymen qatar dıhandar men elevator, dıirmen qyzmetkerleri, mamandar eńbekteri de eskerilýi kerek. Syrqat jandarǵa, júre almaıtyn adamdarǵa osy kúni nan ónimderi tegin taratylsa – mereke dańqy arta túsedi. Nan satatyn árbir dúńgirshek, dúkender bul merekege atsalyssa – ol jalpy halyqtyq sıpat alar edi. Al qoǵam qaıratkerleri, saıasatkerler, jazýshylar, BAQ óz tarapynan nannyń qadiri týraly halyqqa aıtyp, merekege ún qossa – eldiń eń úlken ónimine degen qurmet arta túsedi. Mektepter men balabaqshalar da óz hal-qaderinshe «Nan kúnin» atap jatsa – jas óskinderdiń sanasyna nanǵa degen qurmet erte bastan sińe túser edi.
Vladıslav KOSAREV, Májilis depýtaty