El Ilııa Jaqanovty ǵajaıyp kompozıtor retinde biledi. Qazaqstan jáne Qyrǵyz Respýblıkalarynyń eńbek sińirgen qaıratkeri, «Parasat» ordeniniń ıegeri, halyqaralyq Jambyl syılyǵynyń laýreaty syndy ataqtaryn tizbelegende onyń óner zertteýshisi, jazýshy ekenin de aıtpaı ketýge bolmaıdy.
Sóz ben saz qudireti qatar qonǵan tulǵanyń taǵy bir qasıeti bar, ol – sýretshiligi. Tipti jasy jetpisten asqanda H.Dosmuhamedov atyndaǵy Atyraý memlekettik ýnıversıtetin bitirip, kásibı sýretshi atanǵan. Sh.Sarıev atyndaǵy oblystyq kórkemsýret jáne qoldanbaly-sándik óner mýzeıinde Elbasynyń «Rýhanı jańǵyrý» baǵdarlamasy aıasynda Ilııa Jaqanovtyń «Sulýlyqty jyrlaǵan sýretker» atty jeke shyǵarmashylyq kórmesi ótti.
– Ilııa Jaqanovtyń ánderin bala kezimizden tyńdap, sanamyzǵa sińirip óstik, – dedi kórmeniń ashylý saltanatynda oblys ákiminiń orynbasary Álibek Náýtıev. – «Talantty adam barlyq jaǵynan talantty» degen ras. Biz keıingi jyldary kompozıtordy sýretshilik qyrynan da tanyp kelemiz. Ár týyndysy keremet bir áýenmen terbelip turǵandaı áser qaldyrady.
Ilııa Jaqanov sýretshi bolýdy bala kezinen armandapty. «Qaryndashpen anam men ákemniń, aǵamnyń sýretterin salatynmyn. Shyǵarmashylyq adamy bir jerde toqyrap qalmaýy kerek. Men de únemi izdeniste júrgendi qalaımyn. Tabıǵatpen tildesemin. Kartınalarymnyń bárin shabytpen saldym», – deıdi ózi.
Kórmege qylqalam sheberiniń 70-ke jýyq týyndysy qoıyldy. Qazaqtyń keń jazıra dalasyn sýrettegen «Jeruıyq» toptamasy, Jaıyqqa arnalǵan peızajdyq týyndylar, portretter men grafıkalyq jumystar kórmege kelýshilerdiń kóńilderinen shyqty. Sharada kompozıtordyń ánderi shyrqalyp, shyǵarmashylyǵy jaıly beınefılm de kórsetildi.
Baqytgúl BABASh, «Egemen Qazaqstan»
ATYRAÝ