N.Pogodın atyndaǵy oblystyq orys drama teatrynda oblys ákimi S. Bilálovtiń bastamasymen “Qazaq eli, bir aýyz sózim saǵan!” atty birinshi respýblıkalyq óner festıvali uıymdastyryldy. Mádenı shara Táýelsizdiktiń 20 jyldyǵyna oraı ótip, alty Alashtyń aqıyq aqyny Maǵjannyń rýhyna arnaldy. Án men jyr keshine elimizdiń ár qıyrynan kóptegen úmitkerler qatysyp, jazba aqyndardyń Maǵjanǵa arnalǵan músháırasy, Maǵjan óleńderin mánerlep oqý, Maǵjan óleńderine jazylǵan jańa ánder atalymdary boıynsha baq synasty.
Festıvaldiń ashylý saltanatynda sóz sóılegen Serik Bilálov Táýelsizdigimizdiń 20 jyldyǵy qarsańynda mundaı sharanyń uly aqynnyń kindik kesken jerinde ótýi soltústikqazaqstandyqtar úshin úlken mártebe ekenin aıta kelip, aqyn shyǵarmashylyǵyn zertteýge súbeli úles qosyp kele jatqan oblystyń qurmetti azamaty Mútállap Qanǵojınge jeńil kóliktiń kiltin tartý etti. Sábıt Muqanov atyndaǵy oblystyq ǵylymı ámbebap kitaphana ujymy alǵys hatqa ıe boldy. Quramynda Qazaqstannyń Eńbek Eri, halyq jazýshysy Ábish Kekilbaev, “Egemen Qazaqstan” respýblıkalyq gazeti” AQ vıse-prezıdent – bas redaktory Janbolat Aýpbaev, Parlament Májilisiniń depýtaty Jarasbaı Súleımenov, Jambyl atyndaǵy Qazaq memlekettik fılarmonııasynyń bas dırektory, Qazaqstannyń eńbek sińirgen ártisi Muhtar О́teýov, taǵy basqa belgili azamattardan turatyn qazylar alqasy jazba aqyndardyń Maǵjanǵa arnalǵan músháırasynda Almaty qalasynan kelgen Járken Bódeshulyn birinshi júldege laıyq dep tapty. Maǵjan óleńderine jazylǵan ánder baıqaýynda belgili sazger Jolaman Tursynbaevtyń shoqtyǵy bıik boldy. Maǵjan óleńderin mánerlep oqýda astanalyq GaýHar Júsipova aldyna jan salmady. Festıval jeńimpazdary men júldegerleri arnaýly dıplomdarmen jáne baǵaly syılyqtarmen marapattaldy.
О́mir ESQALI.
Soltústik Qazaqstan oblysy.