Syrdarııa aýdanynda 10 arendalyq úıdiń kilti tabystaldy, al Jalaǵash jáne Qarmaqshy aýdandarynda jol boıy servıstik keshender jumysyn bastady.
Syrdarııa aýdanynyń ortalyǵy Terenózek kentinde az qamtylǵan otbasylar úshin 10 arendalyq úı paıdalanýǵa berildi. Qyzylorda oblysynyń ákimi Qyrymbek Kósherbaev kent turǵyndaryn Táýelsizdik kúnimen jáne qonys toılarymen quttyqtap, baspananyń kiltin tabystady.
«Búgin eń úlken mereke. Álemde qanshama halyq bar memleketi, jeri joq.. Elbasymyzdyń sarabdal saıasatynyń arqasynda táýelsizdigimiz tuǵyrly bolyp, qazaqstandyqtar bolashaqqa úlken senimmen qaraıdy. Ásirese, Syr óńirin árqashan qoldap kelgeni úshin myń alǵys aıtamyz. Qyzylordalyqtar, óz kezeginde, Ult kóshbasshynyń senimin aqtaı bildi dep aıta alamyn. Kez kelgen aımaqtyń damýynyń aıqyn kórinisi – qurylys jumystarynyń kólemi. Qyzylorda oblysynda 5 jyl ishinde 3,5 ese, al oblys ortalynda 8 ese ósti. Syrdarııa aýdanynda kelesi jyly 84 páter salynatyn bolady. Terenózek kentinde úı kezeginde 350 adam tursa, 2018 jyly olardyń sany úshten bir bólikke azaımaq», - dep atap ótti Q.Kósherbaev.
Jalaǵash aýdanynda oblys ákimi kásipker Bolat Uzaqovtyń «Batys Eýropa – Batys Qytaı» halyqaralyq dáliziniń boıynda salynǵan «S» sanattaǵy servıstik kesheniniń ashylý rásimine qatysty. Bul nysan «Bıznestiń jol kartasy-2020» baǵdarlamasy aıasynda salyndy, quramynda dámhana, saýda pavılony jáne qonaq úıi bar. Sondaı-aq, keshen aýmaǵynda 12 jeńil avtokólik, 2 avtobýs jáne 7 júk kólikteri qarastyrylǵan. Nysan tolyq paıdalanýǵa berilgen soń munda 25 adam jumyspen qamtylatyn bolady.
Osyndaı keshen qarasha aıynda Qarmaqshy aýdanynda da jumysyn bastady. Jol boıy kesheniniń ıesi Alı Ragıbov aımaq basshysyn nysan jumysymen tanystyrdy. 2017 jyly óńirde barlyǵy 36 servıstik keshen salynyp, 1000 astam jańa jumys orny ashylady.
Sonymen qatar, oblys ákimi aýdandarǵa jumys sapary barysynda Jalaǵash aýdanynyń Tań aýyldyq okrýgindegi «Tań bóbegi» balabaqshasynyń jumysymen tanysty. 120 oryndyq balabaqsha «Tań LTD» JShS qarajatynyń esebine memlekettik-jekemenshik áriptestik aıasynda ashyldy. Kásiporyn burynǵy balabaqshanyń eski ǵımaratynda kúrdeli jóndeý ótkizip, iske qosty. Balabaqshada 22 adam jumys isteıdi.
Sondaı-aq, aımaq basshysy aýdandarda qoǵamdastyq ókilderimen kezdesip, eldi mekenderdiń ózekti máselelerin talqylady jáne túrli sala ozattaryn alǵys hattarmen marapattady.