Qazaqstannyń Halyq ártisi, «Qurmet», «Parasat» ordenderiniń ıegeri Quman Tastanbekov dúnıeden ozdy. Bul aqparatty M.Áýezov atyndaǵy Qazaq memlekettik akademııalyq drama teatrynyń baspasóz qyzmeti rastady, dep habarlaıdy QazAqparat.
«Búgin ókinishtisi, Quman aǵamyz dúnıeden ótti. Qoshtasý rásiminiń ýaqyty áli belgilengen joq. Quman aǵamyz 1969 jyldan bastap, M. Áýezov atyndaǵy akademııalyq drama teatrynda qyzmet etip kelgen», - dedi baspasóz qyzmetindegiler.
Quman Tastanbekov 1945 jyly burynǵy Taldyqorǵan oblysynda dúnıege kelgen. Qazaqstannyń Halyq ártisi, Qazaqstan Lenındik komsomol syılyǵynyń laýreaty, «Qurmet», «Parasat» ordenderiniń ıegeri. 1969 jyly Qazaq Memlekettik Qurmanǵazy atyndaǵy konservatorııanyń teatr fakýltetin bitirgen. Ol sahnada O. Bókeevtiń «Qulynym menińdegi» - Jan, «Vetnam juldyzyndaǵy» - Ushqysh, Á. Nurpeıisovtiń «Qan men terinde» - Táńirbergen, Ǵ. Músirepovtiń «Aqan seri-Aqtoqtysynda» - Aqan, S. Muqanovtyń «Shoqan Ýálıhanovyndaǵy» - Shoqan, T. Ahtanovtyń «Antynda» - Saýran, M. Áýezovtiń «Aıman-Sholpanynda» - Álibek, T. Ahtanovtyń «Joǵalǵan dosynda» - Estemesov, Sh. Aıtmatovtyń «Ana-Jer-anasynda» - Qasym, «Aq kemesinde» - Qulbek, E. Dombaevtyń «Bizdiń klastyń qyzdarynda» - Tólegen, B. Muqaıdyń «О́mirzaıasynda» - Sezar, F.Erveniń «Túlki bıkeshinde» - Florıdor, N. Hıkmettiń «Farhad-Shyrynynda» - Farhad syndy negizgi rólderdi somdady. Teatr repertýarynda júrip jatqan spektaklderde - Shahımardenniń «Tomırısinde» - Balqash, S. Toraıǵyrovtyń «Qamar sulýynda» - Omar, S. Muqanovtyń «Móldir mahabbatynda» - Jaqypbek, T. Nurmaǵanbetovtiń «Eski úımen qoshtasýynda» - Jalǵasbek, B. Jákıevtiń «Júreıik júrek aýyrtpaıynda» - Qarııa, M. Zadornovtyń «Kúıeýińizdi satyńyzshy» komedııasynda - Andreı, G. Gaýptmannyń «Ymyrttaǵy mahabbatynda» - Shteınıs, Shekspırdiń «Romeo men Djýlettasynda» - Montekkı, D. Kobýrnnyń (aýd. E. Amanshaev) «Jynoınaǵynda» - Veller Martın (rej. E.A manshaev, A. Kákisheva), A. Chehovtyń «Apaly-sińlili úsheý» dramasynda (aýd. Á. Bópejanova, rej. R. Andrıasıan, A. Kákisheva) - Kýlygın rolderin somdaǵan.
«Q. Tastanbekovtiń kıno óneri salasyndaǵy eńbegi de eleýli. Ol ataqty «Qyz Jibek» fılmindegi (rejısser S. Qojyqov, ssenarıı Ǵ. Músirepov, redaktor A. Súleımenov, 1970 j.) Tólegen rólimen «juldyzy janǵan» akter. Budan keıin de kóptegen fılmge - «Bizdiń Ǵanı»» (1971), «Qys - sýarmaly kezeń emes» (1972), «Munda aqqýlar ushyp keledi» (1973), «Aqqýlar jańǵyryǵy» (1974), «Qosymsha saýaldar» (1978), «Aǵamnyń qalyńdyǵy» (1979), «Provınsıaldy roman» (1981), «Qarasha qazdar qaıtqanda» (1981), «О́rnek» (1982), «Alań jıeginde» (1982), «Kimsiń sen, salt atty?» (1987),«Adam-jel» (2003), «Mahambet» (2008) t.b. túsken», -delingen Áýezov teatrynyń málimetinde.
Qazaqstannyń halyq ártisi (1993), KSRO Kınematografıster odaǵynyń múshesi (1991), Qazaqstan Lenındik komsomol syılyǵy laýreaty (1976). «Qurmet» ordeniniń ıegeri (2008), QR Táýelsizdik kúnine oraı, Almaly aýdanynyń áleýmettik, ekonomıkalyq, qoǵamdyq, saıası ómirine qosqan úlesi, joǵary kásibı biliktigi men azamattyq belsendiligi úshin marapattalǵan.