Keshe О́skemenniń irgesindegi «Altaı Alpisi» taý shańǵysy kesheninde qysqy týrıstik maýsymnyń ashylý saltanaty ótti.
Oblystyq týrızm jáne syrtqy baılanystar basqarmasynyń muryndyq bolýymen ótken shara barysynda qala turǵyndary men qonaqtaryna demalys ornyna baryp-qaıtatyn avtobýstar (shahardaǵy avtobýs baǵasymen) uıymdastyrylyp, demalýshylar arqan joldarymen tegin kóterilip, shańǵy tebýge múmkindik aldy.
«Shyǵys Qazaqstannyń tabıǵaty kórkem, aımaqta týrızmdi damytýǵa múmkindik mol. Qazir óńirde qysqy týrızmdi óristetýge kóp kóńil bólinip jatyr deýge bolady. Qysty týrızmdi damytýǵa qolaıly oryndardyń biri – «Altaı Alpisi» taý shańǵysy kesheni. Sondyqtan da osy jerdi arnaıy tańdap, is-sharamyzdy ótkizip jatyrmyz. Ásirese jastardyń qysqy sport túrlerimen shuǵyldanýyna erekshe den qoıyp otyrmyz. О́skemendegi «Úmit» balalar úıinen 60 balany demalys ornyna arnaıy shaqyrdyq. О́zderińiz kórip otyrǵandaı, búgin halyq kóp jınaldy. Mundaı sharalar basqarma tarapynan aldaǵy ýaqytta da uıymdastyrylatyn bolady», - deıdi atalǵan basqarmanyń týrızmdi damytý bóliminiń basshysy Raýshan Mustafına.
«Búgin taza aýaǵa shyǵyp, shańǵy teýip sergip qalǵan jaıymyz bar. О́skemennen demalys bazasyna deıin avtobýstar shyǵarylǵanyna qala turǵyndary rızashylyqtaryn bildirip jatyr. Osyndaı avtobýstar ár apta saıyn senbi nemese jeksenbi kúnderi turaqty túrde júretin bolsa, qysqy týrızmge qyzyǵýshylar qatary arta túser edi», - deıdi О́skemennen shańǵy tebýge arnaıy barǵan bloger, qoǵam belsendisi Ádil Qarataı.
Azamat QASYM, «Egemen Qazaqstan»