Astanada qazaq saıttary redaktorlarynyń kezekti forýmy ótti.
«Qazaqstannyń úshinshi jańǵyrýy aıasynda medıa resýrstar naryǵynyń damýy» taqyrybymen ótken jıynǵa Aqparat jáne kommýnıkasııalar mınıstri Dáýren Abaev, Qazaqstandaǵy AQSh elshisi Djordj Krol qatysty.
Sharany «Qazaqstan» teleradıokorporasııasy, baspasóz klýby jáne Qazaqstandaǵy AQSh elshiligi uıymdastyrdy. Forýmnyń maqsaty – qazaqsha saıttardy damytý, kontent sapasyn arttyrý jáne osy saladaǵy ózekti máselelerdiń sheshimin tabý.
Jıynda sóz sóılegen Aqparat jáne kommýnıkasııalar mınıstri D.Abaev buqaralyq aqparat quraldaryna qatysty zań jobasyn túsindirip, osy salanyń jańa damý strategııasy jóninde áńgimelep berdi.
«Kelesi jyldan bastap buqaralyq aqparat salasyndaǵy strategııalyq mańyzy bar qujat ázirleý josparda bar. Keleshekte qaı baǵytta jumys isteıtinimiz jáne damý basymdyqtarymyz anyqtalady. 2018 jyldyń sońyna deıin qujatty tanystyryp úlgeremiz», dedi mınıstr.
Budan bólek, Vedomstvo basshysy aqparattyq-kommýnıkasııalyq tehnologııalardyń damýyna toqtaldy. Onyń aıtýynsha, qazirgi tańda áleýmettik jeliler BAQ-qa básekeleske aınalǵan. Sonyń nátıjesinde áleýmettik jelilerge shyqqan ótirik aqparat jýrnalıstiń eńbegin joqqa shyǵarýy múmkin. D.Abaevtyń pikirinshe, jaǵdaıdyń osylaı órbýi kásibı mamandarǵa suranysty arttyryp otyr. Sondaı-aq, mınıstr qazaq saıttary redaktorlary forýmynyń mańyzdylyǵyna toqtaldy.
«Internettiń qarqyndy damýy kommýnıkasııa quraldaryn bir arnada toǵystyryp, dástúrli BAQ pen jańa medıanyń sabaqtastyǵy kúsheıte tústi. Sondyqtan osy saladaǵy eń mańyzdy máselelerdi birlese talqylaýǵa shaqyrdyq. Forýmda talqylanǵan pikirler eldegi aqparat salasynyń damýyna úles qosady dep senemin», dedi D.Abaev.
Forým barysynda jan-jaqtan jınalǵan mamandar qazaq tildi saıttarǵa qatysty óz oılaryn ortaǵa salyp, tájirıbelerimen bólisti. Jıynda kontent sapasy men oqyrman talaby, jarnama men monetızasııa máseleleri talqylandy. Sonymen qatar, jańa medıa men dástúrli BAQ-tyń aıyrmashylyǵy men uqsastyǵy, qazirgi trendter men jańa tehnologııalar sóz boldy.
Abaı ASANKELDIULY,
«Egemen Qazaqstan»