Shyǵysqazaqstandyq sportshy Avstrııanyń Sant-Ýlrıham qalasynda ótken halyqaralyq FIS start saıysynda 10 shaqyrymdy klassıkalyq ádispen júgirýden altynnan alqa taǵyndy.
Atalmysh básekede barlyǵy 72 shańǵyshy jarys jolyna shyqty. Olardyń qatarynda oblystyq dene shynyqtyrý jáne sport basqarmasynyń «ShQO qysqy sport túrleri boıynsha joǵary sport sheberligi mektebi» KMM-niń tárbıelenýshisi Ivan Lıýft te boldy. Basqarmanyń baspasóz qyzmetiniń habarlaǵanyndaı, máre syzyǵyn 26.55.0. ýaqytymen kesip ótken ShQO shańǵyshysy tuǵyrdyń eń bıik satysynan oryn aldy. Júlde úshin talasta Ivan Lıýft qos birdeı fransýz sportshylarynan aılasyn asyrdy.
Esterińizge sala keteıik, bul - shyǵysqazaqstandyq shańǵyshynyń alǵashqy júldesi emes. Buǵan deıin Fınlıandııanyń Kontıolahtı qalasynda ótken halyqaralyq FIS start jarysynda 10 shaqyrymdy klassıkalyq ádispen júgirýde de top jarǵan bolatyn.
Azamat QASYM,
«Egemen Qazaqstan»
Shyǵys Qazaqstan oblysy