Keshe Parlament Májilisiniń Tóraǵasy Nurlan Nyǵmatýlınniń jetekshiligimen ótken palatanyń jalpy otyrysynda memleketaralyq salyq qatynastaryn retteýge baǵyttalǵan birqatar zań jobalary maquldandy. Sonyń biri – Qazaqstan men Úndistan Úkimetteri arasyndaǵy qosarlanǵan salyq salýdy boldyrmaý jáne tabys pen kapıtalǵa salynatyn salyqtarǵa qatysty salyq salýdan jaltarýǵa jol bermeý týraly konvensııaǵa jáne onyń Hattamasyna ózgerister men tolyqtyrýlar engizý týraly zań jobasy boldy.
Aldymen osy zań jobasyna qatysty túsinik bergen Májilis Tóraǵasy Úndistanǵa qatysty qaralyp jatqan konvensııa 20 jyldan beri qoldanysta ekenine nazar aýdaryp, osyndaı kelisimderdiń tıimdiligin taldap, olardy ýaqtyly jańartý qajettiligine kóńil bóldi. «Jalpy hattama salyqtyq qatynastardyń salystyrmaly turaqtylyǵyna kepildik beredi jáne kiristerge qosarlanǵan salyq salýdy bolǵyzbaıdy. Bul eki memleket arasyndaǵy anaǵurlym tyǵyz ekonomıkalyq baılanystardy jolǵa qoıýǵa múmkindik beredi», dedi N.Nyǵmatýlın.
Al zań jobasy jóninde baıandama jasaǵan Qarjy mınıstri Baqyt Sultanov atalǵan hattama aqparat almasý jolymen eki memlekettiń salyq qyzmetteriniń yntymaqtastyǵyn odan ári damytýǵa jáne Qazaqstan Respýblıkasyna jekelegen kiris túrlerine salyq salý quqyǵyn berý bóliginde konvensııanyń jekelegen erejelerin qaıta qaraýǵa baǵyttalǵanyna basymdyq berdi. «Osy hattamamen «Qazaqstan» termınine ózgeris engizildi, sondaı-aq konvensııada qoldanylatyn qazaqstandyq salyqtardyń ataýlary qoldanystaǵy zańnamamen naqtylandy. Oǵan qosa eldiń ekonomıkalyq múddeleri eskerilip, salyq salý máselelerin naqtylaý nemese qaıta qaraý bóliginde ózgerister engizildi. Atap aıtqanda, turaqty mekemege, basqa da kiristerge qatysty ózgerister men tolyqtyrýlar, sondaı-aq ýaǵdalasýshy memleketterdegi rezıdenttikti aıqyndaýdy retteıtin bap erejeleri naqtylandy», dedi B.Sultanov. Al qosymsha baıandama jasaǵan Qarjy jáne bıýdjet komıtetiniń múshesi Aleksandr Sýslov bolsa, salyqtyq jaltarýlardy bolǵyzbaý jáne salyqtyq qyzmetter arasyndaǵy yntymaqtastyqty keńeıtý maqsatynda rezıdenttikti aıqyndaýdy retteıtin birqatar bapqa aqparat almasýǵa, jeńildikterdi shekteýge jáne salyqtardy jınaýǵa kómek berýge qatysty túzetýler engizilgendigin atap ótti.
Odan keıin depýtattar kún tártibine saı «Qazaqstan men Irlandııa Úkimetteri arasyndaǵy Tabysqa salynatyn salyqtarǵa qatysty qosarlanǵan salyq salýdy boldyrmaý jáne salyq salýdan jaltarýǵa jol bermeý týraly konvensııany jáne oǵan hattamany ratıfıkasııalaý týraly» zań jobasyn maquldady. Bul konvensııanyń maqsaty – ınvestısııalar úshin qolaıly jaǵdaı jasaý arqyly Qazaqstan men Irlandııa arasyndaǵy ekonomıkalyq yntymaqtastyqty nyǵaıtý jáne keńeıtý bolyp tabylady. Qarjy mınıstri B.Sultanov tanystyrǵan konvensııada osy nemese ózge ýaǵdalasýshy memlekettiń rezıdentteri bolyp tabylatyn zańdy jáne jeke tulǵalardyń kiristerine qosarlanǵan salyq salýdy bolǵyzbaý kózdeledi. Al Qarjy jáne bıýdjet komıtetiniń múshesi Ekaterına Nıkıtınskaıanyń túsindirýinshe, qujatta qosarlanǵan salyq salýdy bolǵyzbaý árbir ýaǵdalasýshy memleketter konvensııanyń erejelerine sáıkes salyq tóleýshige salyqty bir ret qana – ýaǵdalasýshy memleketterdiń birinde tóleý múmkindigi qamtamasyz etiledi. «Ekinshi memleket salyq zańnamasynda belgilengen ádiske qaraı, oǵan tólengen salyq somasyna esepke jatqyzady nemese ekinshi memlekette salyq salý boıynsha júrgizilgen kiristi salyq salynatyn jıyntyq kiristen alyp tastaıdy», dedi ol óz sózinde.
Otyrys aıasynda Májilis depýtattary Ákimshilik quqyq buzýshylyq týraly kodekske ózgerister men tolyqtyrýlar engizý týraly zań jobasyna Senat engizgen ózgeristermen kelisip, Qazaqstan Úkimeti men Ázerbaıjan Úkimeti arasyndaǵy Halyqaralyq avtomobıl qatynasy týraly kelisimdi ratıfıkasııalaý týraly zań jobasyn maquldady. Qazaqstan men Ázerbaıjan arasyndaǵy halyqaralyq avtomobıl qatynasynda jolaýshylar men júkterdi tasymaldaýdy, olardyń aýmaqtary arqyly tranzıtti júzege asyrý úshin quqyqtyq negiz jasaýdy kózdeıtin bul qujat aıasynda memleketter arasynda saýda-ekonomıkalyq yntymaqtastyqty belsendi damytý men iskerlik baılanystardy tereńdetý qarastyrylady.
Sondaı-aq osy kúni Májilis Qazaqstan men Halyqaralyq qaıta qurý jáne damý banki arasyndaǵy Qaryz týraly kelisimdi (Orta bilim berýdi jańǵyrtý jobasy) ratıfıkasııalaý týraly jáne Teńiz keme qatynasy qaýipsizdigine qarsy baǵyttalǵan zańsyz is-árekettermen kúres týraly konvensııaǵa 2005 jylǵy hattamany ratıfıkasııalaý týraly syndy birqatar ratıfıkasııalyq zań jobalary boıynsha beıindi komıtetterge qorytyndy ázirleý merzimderin belgiledi. Sonymen qatar depýtattar jıyn aıasynda Qazaqstan Respýblıkasy Ortalyq saılaý komıssııasynyń músheleri M.Sársembaev pen V.Foostyń ókilettikterin óz ótinishteri boıynsha merziminen buryn toqtatý týraly qaýly qabyldap, Z.Baımoldına men N.Godýnovany Qazaqstan Respýblıkasy Ortalyq saılaý komıssııasynyń múshesi qyzmetine taǵaıyndady.
Otyrys sońynda ádettegideı halyq qalaýlylary sóz alyp, G.Bıjanova, M.Magerramov, A.Smaǵulov, E.Bekturǵanov, N.Mıkaelıan, Z.Balıeva, J.Omarbekova, A.Raý syndy depýtattar ortalyq memlekettik organ basshylarynyń atyna óz saýaldaryn joldady.
Nurlybek DOSYBAI, «Egemen Qazaqstan»