Táýelsizdiktiń jıyrma jyldyǵy qarsańynda Jazýshylar odaǵynda da kóptegen ıgilikti is-sharalar atqarylýda. Sonyń biri «Táýelsizdik sabaqtary» atty taqyryp aıasynda memleket jáne qoǵam qaıratkeri, jazýshy-jýrnalıst Balǵabek Qydyrbekulynyń «Alataý» romany men halyqaralyq «Alash» syılyǵynyń ıegeri, belgili aqyn Nesipbek Aıtovtyń «Shapyrashty Naýryzbaı» dastanynyń tanystyrylymy ótti.
– Eldiń, ulttyń ómirindegi eleýli kezeńderinde, – dedi jıyndy ashqan Jazýshylar odaǵynyń tóraǵasy, aqyn Nurlan Orazalın, – sózdiń tarıhy men sózdiń taǵdyry qalaı baılandy deıtin búgingi áńgimemizge arqaý bolyp otyrǵan dúnıe – qazaqtyń kórnekti qalamgeri Balǵabek aǵamyzdyń keshegi Keńes odaǵy tusynda «Alataý» romany «qaıshyǵa» túsip, tolyq jarııalanbaǵan edi. Búgin sol úlken eńbektiń tolyq nusqasy qolymyzǵa tıip otyr.
Ekinshi kitap qazaqtyń bahadúr batyrlarynyń biregeıi Shapyrashty Naýryzbaı jónindegi poema. Halyqaralyq «Alash» syılyǵynyń laýreaty, arqaly aqyn Nesipbek Aıtovtyń bul poemasynyń tolyq nusqasy kezinde «Egemen Qazaqstanda» jarııalanǵan-dy. Avtor ǵasyrlar qoınaýyna ketetin tarıhymyzdy óleńniń órnegimen, óleńniń tilimen jyrlap, sońǵy kezderi umytylyp bara jatqan dastan, poema janryna qaıta qanat bitirip otyr deı kelip, demeýshilik jasaǵan, ónerdiń, ádebıettiń janashyry Serikbaı Nurǵısaevqa ol jurtshylyq atynan rızashylyq bildirdi.
Alǵash sóz kezegin alǵan belgili synshy, ádebıettanýshy, fılologııa ǵylymdarynyń doktory, professor Tursynbek Kákishev B.Qydyrbekulynyń shyǵarmashylyǵy, romannyń qazaq ádebıetindegi orny týraly sóz etse, Almaty oblysy máslıhatynyń hatshysy Ardaq Sadyqov B.Qydyrbekulynyń bul týyndysy HH ǵasyrdyń basynan elýinshi jylǵa deıingi elimizde bolǵan saıası-áleýmettik ahýaldy jan-jaqty baıandaıtyn ensıklopedııalyq eńbek ekenin atap ótti.
Sondaı-aq aqyn-jazýshylar Sáken Imanasov, Smaǵul Elýbaı, Qýanyshbaı Qurmanǵalıev, Nurdáýlet Aqyshev, Jumabaı Shashtaıuly, kompozıtor Balnur Qydyrbek jáne t.b. qos eńbek týraly óz oılaryn ortaǵa saldy.
Gúlzeınep SÁDIRQYZY.
––––––––––––––––
Sýretterdi túsirgen Bersinbek SÁRSENOV.