Ahmetjan Esimov «Samuryq-Qazyna» ulttyq ál-aýqat qory» AQ basqarmasynyń tóraǵasy qyzmetine taǵaıyndaldy, dep habarlaıdy QR Premer-mınıstriniń baspasóz qyzmeti.
Elbasy Nursultan Nazarbaevtyń tapsyrmasymen QR Premer-Mınıstri Baqytjan Saǵyntaev pen QR Prezıdenti Ákimshiliginiń basshysy Ádilbek Jaqsybekov «Samuryq-Qazyna» ulttyq ál-aýqat qory» AQ ujymyna jańa tóraǵa - Ahmetjan Esimovti tanystyrdy.
Premer-mınıstr Ahmetjan Esimovtiń el aldyndaǵy jáne kúrdeli memlekettik tapsyrmalardy oryndaýdaǵy joǵary kásibıligi men jaýapkershiligin atap ótti. Sondaı-aq qor aldynda transformasııa baǵdarlamasyn damytý sııaqty joǵary mindetter turǵanyna da toqtalyp ótti.
Ahmetjan Esimov 1950 jyly 15 jeltoqsanda Almaty oblysynda dúnıege kelgen. «Aýyl sharýashylyǵy óndirisiniń prosester mehanızasııasy» mamandyǵy boıynsha 1974 jyly Qazaq aýylsharýashylyq ınstıtýtynyń mehanıkalyq fakýltetin bitirgen. «Áleýmettik-saıası qatynastar teorııasy» mamandyǵy boıynsha 1991 jyly Reseı qoǵamdyq ǵylymdar akademııasynyń áleýmettik-saıası fakýltetin támamdaǵan. Ekonomıka ǵylymdarynyń doktory 1990 jyldan - QazKSR Memagroónerkásip tóraǵasynyń birinshi orynbasary. 1992 jyldan - Almaty oblystyq ákimshiliginiń basshysy. 1994 jyldan - QR Premer-Mınıstriniń orynbasary. 1996 jyldan - QR Memlekettik hatshysy. 1996 jyldan - QR Premer-Mınıstriniń birinshi orynbasary - Memlekettik qarjy salymdar komıtetiniń tóraǵasy. 1998 jyldan - QR Prezıdenti Ákimshiliginiń basshysy. 1998 jyldan - QR Benılıýks memleketterindegi Tótenshe jáne О́kiletti Elshisi. 2001 jyldan - QR Aýyl sharýashylyǵy mınıstri. 2002 jyldan - QR Premer-Mınıstriniń orynbasary - Aýyl sharýashylyǵy mınıstri. 2004 jyldan - QR Premer-Mınıstriniń orynbasary. 2006 jyldyń qańtar aıynan - QR Aýyl sharýashylyǵy mınıstri. 2008 jyldan beri - Almaty qalasynyń ákimi.
«Nur Otan» HDP qalalyq fılıalynyń tóraǵasy (2008 jyldan). 2015 jyldyń 9 tamyzynan "Astana EKSPO-2017" UK basqarmasynyń tóraǵasy qyzmetin atqardy. «Qurmet belgisi» (1982), «Parasat» (2002), «Otan» (2007) ordenderimen marapattalǵan.