Astanada «Sóz qazynasy» anımasııalyq fılminiń balalarǵa arnalǵan aldyn ala kórsetilimi ótti.
Elimizde tilderdi damytý men qoldanýdyń 2011-2020 jyldarǵa arnalǵan memlekettik baǵdarlamasy aıasynda QR Mádenıet jáne sport mınıstrligi Tilderdi damytý jáne qoǵamdyq-saıası jumys komıtetiniń tapsyrysymen kóptegen jobalar iske asýda. Onyń ishinde elimizdiń rýhanı qundylyqtaryn jańǵyrtyp, baı qazynamyzdy tolyqtyra túsetin kitaptar, qazaq tilin qoldaný aıasyn keńeıtýge septigin tıgizetin oqý-ádistemelik quraldar, jastardy tildi meńgerýge jeteleıtin televızııalyq jobalar, t.b. bar. Ilkimdi isterdiń qatary jýyrda taǵy bir tyń joba, «Sóz qazynasy» atty anımasııalyq fılmmen tolyqty.
Mýltfılm qazaqtyń baı til murasy men salt-dástúrlerin balalarǵa nasıhattaý, ádette biz maǵynasyna kóp úńile bermeıtin yrym-tyıymdardyń mán-mańyzyn ashyp kórsetý maqsatynda daıyndalǵandyqtan olar oıyn elementteri arqyly qazaq ertegileriniń keıipkerleriniń shytyrman oqıǵalarymen beınelengen.
«Fılm personajdaryn daıyndaý kezinde jańa tujyrymdama jasalyp, keıipkerlerdiń barynsha tartymdy bolýy oılastyryldy. Bul anımasııalyq fılmniń ádettegi ónimderden aıyrmashylyǵy – ssenarıı qurylymy ulttyq folklor erekshelikterin balalarǵa ońaı túsindirý úshin oqıǵalar qııal-ertegi elementterine súıengen. Onda 13 keıipker bar. Qosalqy keıipkerlerdiń sany 30-ǵa jýyqtaıdy. Fılmdi dybystaýǵa elimizge tanymal akterlar tartyldy. О́nim 15 serıadan turady, 2D, 3D formatta daıyndaldy», deıdi jobanyń shyǵarmashylyq jetekshisi Azamat Keńesuly.
«Balalardyń tilin, oı-órisin damytýǵa baǵyttalǵan kontentti kóbeıtý maqsatynda 2013 jyldan bastap anımasııalyq fılmder shyǵaryp kele jatyrmyz. Mysaly, 2013 jyly 50 serıaly anımasııalyq fılm shyqqan bolsa, 2014-2016 jyldary da týra solaı. «Dına men Danık», «Kúnikeı jáne onyń dostary», «Jandos jáne onyń dostary» kóp serıaly anımasııalyq fılmder shyǵaryldy. Olardyń barlyǵy da balalardyń oı-órisin, sóıleý qabiletin, tilin damytý maqsatynda shyǵarylyp otyrǵan anımasııalyq fılmder. Qazaq tilin úıretýge baǵyttalǵan kýrstyq anımasııalyq fılmder dep aıtýǵa da bolady. Bıylǵy jobamyz «Sóz qazynasy» dep atalatyn mýltfılm. Bul da qazaqtyń kópten kónergen salt-dástúrlerin jańǵyrtý, balalarǵa nasıhattaý, túsindirýdi kózdeıtin joba. Kónergen sózderdiń mán-maǵynasyn ashyp jeńil, balalarǵa uǵynyqty túrde túsindirý maqsatynda shyǵarylyp jatyr», deıdi QR Mádenıet jáne sport mınıstrligi Tilderdi damytý jáne qoǵamdyq-saıası jumys komıtetiniń bas mamany, joba jetekshisi Oljas Shynjigitov.
«Sóz qazynasy» anımasııalyq fılmi 2018 jyly «Balapan» telearnasynyń efırinen kórsetiletin bolady.