Senat Bıýrosynyń otyrysynda Qasym-Jomart Toqaev palatanyń 2017 jylǵy jumysyn qorytyndylady. Tóraǵa depýtattardyń zań shyǵarý jumystaryna oń baǵa berip, qoǵamda zor yqylas týǵyzǵan parlamenttik tyńdaýlar, dóńgelek ústelder men kezdesýlerdiń joǵary deńgeıde uıymdastyrylǵanyn atap ótti.
Senat Tóraǵasy Memleket basshysynyń III sessııanyń ashylýynda aıtqan tapsyrmalaryn depýtattardyń oryndaǵanyn jáne bizdiń elimiz úshin asa mańyzdy kodekster men zańdar qabyldanǵanyn aıtty. Olardyń qatarynda Salyq, Keden jáne Jer qoınaýy kodeksteri, úsh jyldyq bıýdjet, quqyq qorǵaý qyzmetiniń prosestik negizderin jańǵyrtý, aqparat jáne kommýnıkasııalar týraly zańdar bar. Ákimshilik quqyq buzýshylyq týraly kodekske túzetýlerdiń toptamasy engizildi.
Q.Toqaev senatorlardy qabyldanǵan zańnamalyq aktilerdiń mazmuny týraly jurtshylyqty habardar etý úshin 2018 jylǵy qańtardyń basyna belgilengen el aımaqtaryndaǵy túsindirý jumystaryn belsendi júrgizýge shaqyrdy.
Bıýroda Senattyń 2018 jylǵa arnalǵan Negizgi sharalar jospary bekitildi. Depýtattar aldaǵy jyly Prezıdent N.Nazarbaevtyń jyl saıynǵy Qazaqstan halqyna Joldaýyn iske asyrýdy zańnamalyq turǵydan qamtamasyz etý jumystaryn jalǵastyratyn bolady. Senatta «Halyq densaýlyǵy jáne densaýlyq saqtaý júıesi týraly» kodeksin iske asyrý barysyna, Qazaqstan ekonomıkasyn damytýdaǵy bank sektorynyń róline, «Sıfrly Qazaqstan» memlekettik baǵdarlamasynyń oryndalýyna, sondaı-aq quqyq qorǵaý qyzmetiniń prosestik negizderin jańǵyrtý taqyrybyna arnalǵan parlamenttik tyńdaýlar uıymdastyrylady.
Palatada zań shyǵarý prosesin jetildirý máseleleri týraly, 2017 jylǵy 22 qyrkúıekte ótken orta bilim berý júıesiniń problemalaryna arnalǵan parlamenttik tyńdaýlar usynymdaryn iske asyrý nátıjeleri boıynsha, elimizdiń «Jasyl ekonomıkaǵa» kóshý tujyrymdamasynyń oryndalýy týraly úkimettik saǵat otyrystaryn ótkizý josparlandy.
2018 jyly Senat komıtetteri elimizdiń ár aımaǵynda 15 kóshpeli otyrys ótkizetin boldy. Odan basqa, zańnamany jetildirý, memlekettik jáne jekelegen salalardy damytý baǵdarlamalaryn iske asyrý máseleleri boıynsha depýtattardyń memlekettik organdar men basqa da uıymdardyń basshylarymen 15 kezdesýi jáne 13 dóńgelek ústel ótkizý josparǵa enip otyr.
Parlamentaralyq yntymaqtastyqty nyǵaıtý Senat qyzmetiniń mańyzdy baǵyty bolyp tabylady. Depýtattar halyqaralyq parlamentaralyq qury- lymdardyń jáne shet memleketterdiń zań shyǵarý organdarymen ózara is-qımyl jónindegi jumys toptaryndaǵy jumystarǵa qatysady.
Palatanyń halyqaralyq qyzmeti senatorlardyń 2018 jylǵy qazan aıynda ótetin Álemdik jáne dástúrli dinder kóshbasshylarynyń VI sezine qatysýymen kórinis tabady.
Senat Bıýrosy 2017 jylǵy 28 jeltoqsanǵa belgilengen palata otyrysynyń kún tártibine Túrikmenstanmen strategııalyq áriptestik týraly shartty, Qazaqstan-Túrikmenstan memlekettik shekarasyn shegendeý týraly kelisimdi, Qazaqstan men Irlandııa arasyndaǵy Tabysqa salynatyn salyqtarǵa qatysty qosarlanǵan salyq salýdy boldyrmaý týraly úkimetaralyq konvensııany ratıfıkasııalaý týraly zań jobalaryn engizý usynyldy. Otyrysta, sondaı-aq «Qazaqstan Respýblıkasyndaǵy baǵalaý qyzmeti týraly», «Jábirlenýshilerge ótemaqy qory týraly» zań jobalary men birqatar zańdarǵa ilespe túzetýler, sondaı-aq «Memlekettik aýdıt jáne qarjylyq baqylaý týraly» zańǵa ózgerister men tolyqtyrýlar engizý týraly» zań jobasyn qaraý kózdelip otyr.
Bıýroda Májilisten túsken zań jobalary Senattyń turaqty komıtetterine bólinip berildi. Ekonomıkalyq saıasat, ınnovasııalyq damý jáne kásipkerlik komıteti Ázerbaıjanmen halyqaralyq avtomobıl qatynastary týraly kelisimdi ratıfıkasııalaý týraly zań jobasy boıynsha bas komıtet bolyp belgilendi. Irlandııamen jáne Úndistanmen tabysqa salynatyn salyqtarǵa qatysty qosarlanǵan salyq salýdy boldyrmaý týraly ekijaqty kelisimderdi ratıfıkasııalaý týraly zań jobalary Qarjy jáne bıýdjet komıtetine tapsyryldy.
Nurlybek DOSYBAI, «Egemen Qazaqstan»