QR Úkimetiniń zań jobalaý jumystarynyń 2017 jylǵa arnalǵan josparynyń oryndalý barysy jáne 2018 jylǵa arnalǵan josparynyń jobasy týraly Premer-Mınıstr Baqytjan Saǵyntaevtyń tóraǵalyǵymen ótken Úkimet otyrysynda ádilet mınıstri Marat Beketaev baıandady.
QR Úkimetiniń zań jobalaý jumystarynyń 2017 jylǵa arnalǵan josparymen 28 zań jobasyn ázirleý kózdelgen bolatyn. Jyl boıy engizilgen túzetýlerdi eskere otyryp, Jospar 22 zań jobasyn ázirleýdi kózdeıdi.
«4 zańǵa Memleket basshysy qol qoıdy, 9-y Parlamenttiń qaraýynda, 4 zań Parlamentpen qabyldanyp, Memleket basshysyna qol qoıýǵa jiberildi jáne aǵymdaǵy jyldyń sońyna deıin 5 zań jobasyn Parlament Májilisine engizý josparlanýda. Osylaısha, Jospardyń tolyq kólemde oryndalǵanyn atap ótýge bolady», — dedi Marat Beketaev.
Ádilet mınıstrligi «Quqyqtyq aktiler týraly» zańnyń jáne Úkimet reglamentiniń talaptaryna sáıkes Úkimettiń zań jobalaý jumystarynyń 2018 jylǵa arnalǵan josparynyń jobasyn ázirledi. Ádilet mınıstriniń aıtýynsha, Jospar jobasy bekitilgen tártipte Memleket basshysymen kelisildi.
«Jospardyń túpkilikti jobasy 18 zań jobasyn ázirleýdi jáne Parlamentke engizýdi kózdeıdi. Olardyń 5-ýi derbes zań jobasy jáne 13-i qoldanystaǵy zańdarǵa ózgerister men tolyqtyrýlardy engizýdi qarastyrady», — dep atap ótti Marat Beketaev.
Úkimet otyrysynda máseleni qaraý qorytyndysy boıynsha zań jobalaý jumystarynyń 2018 jylǵa arnalǵan jospary biraýyzdan bekitildi.