Astanadaǵy «Nur Otan» partııasynyń ǵımaratynda jas ónertapqyshtar arasynda ótkizilgen NURINTECH-2017 respýblıkalyq ınnovasııalyq jobalar baıqaýynyń jeńimpazdary anyqtaldy.
Jeńimpazdar men júldegerlerdi marapattaý rásimine «Nur Otan» partııasy Tóraǵasynyń birinshi orynbasary Muhtar Qul-Muhammed qatysty. NURINTECH jobasy byltyr Elbasy, partııa Tóraǵasy Nursultan Nazarbaevtyń tikeleı bastamasymen qolǵa alynǵan bolatyn. Onyń maqsaty – jastardyń ǵylym men bilimge jáne ınnovasııaǵa degen qyzyǵýshylyǵyn arttyrý.
Jıynda sóz sóılegen M.Qul-Muhammed osyndaı baıqaýlardyń el úshin mańyzy zor ekenine nazar aýdardy. Onyń aıtýynsha, elimizdegi jas ǵalymdar men ónertapqyshtar Elbasynyń ınnovasııany damytýǵa baǵyttalǵan saıasatyn qoldap, júzege asyrýǵa atsalysýy kerek.
«Bıyl ótken «EKSPO-2017» halyqaralyq kórmesi elimizdegi ǵylym men ekonomıka salasyna ólsheýsiz áser etti. Sonyń bir dáleli búgingi baıqaý. Mektep jasyndaǵy balalar ǵylymǵa qyzyǵýshylyq tanytyp otyr», dedi partııa Tóraǵasynyń birinshi orynbasary.
Bıylǵy baıqaýǵa myńnan astam ótinish kelip túsken. Úmitkerler IT jáne áýe-ǵarysh tehnologııasy, energetıka, energııa kózin saqtaý, hımııalyq tehnologııa, nanotehnologııa, agroınnovasııa, tabıǵı qordy tıimdi paıdalaný, resýrstardy saqtaý, robototehnıka, 3D ındýstrııa jáne taǵy basqa túrli salalar boıynsha ózderiniń ınnovasııalyq jumys jobalaryn usynǵan.
Jeńimpazdardy anyqtaý úshin arnaıy baıqaý komıssııasy qurylyp, onyń quramyna Qazaqstannyń belgili ǵalymdary, qoǵam qaıratkerleri, Parlament depýtattary, memlekettik organdar men bıznes-qaýymdastyq ókilderi endi. Barlyq jumysty tyńǵylyqty zertteý nátıjesinde eń úzdik ári suranysqa ıe, ekonomıkalyq jaǵynan tıimdi 25 joba tańdalyp alyndy.
Baıqaý qorytyndysyna saı, «Tehnostart», «Jastardyń ınnovasııalyq jobasy», «Perspektıva», «Áleýmettik mańyzy bar ınnovasııa» atalymdary boıynsha jeńimpazdar anyqtaldy. Budan bólek, «Qazaqstannyń eń úzdik jas ǵalymy» atalymy boıynsha metallýrgııa salasynda resýrstardy saqtaý tehnologııasyn oılap tapqan qaraǵandylyq Erbol Shabanov jeńimpaz atandy. Tıimdi kún kollektorynyń jobasyn usynǵan jambyldyq Gaýhar Smaǵulova ekinshi oryn alsa, kesý quraldaryn bekitetin ınnovasııalyq tehnologııany oılap tapqan shyǵysqazaqstandyq Baýyrjan Rahadılov úzdik úshtikti túıindedi. Baıqaýdyń arnaıy syılyǵy Mbionics kompanııasynyń negizin salýshy, jasandy qol jasaýmen aınalysatyn 23 jastaǵy Máýlen Bekturǵanovqa berildi.
Sonymen qatar bıylǵy baıqaýǵa latynsha jazýǵa qatysty baǵdarlamalar men qosymshalardyń, «jasyl» energetıka men ekologııalyq ınnovasııalyq jobalary qatysty. Jeńimpazdar men júldegerler qarjylaı syılyqtarmen marapattaldy. Ár atalymda top jarǵan jasqa – 1 mıllıon teńge, ekinshi oryn ıelerine – 500 myń teńge, úshinshi oryn alǵan jastarǵa 250 myń teńge kóleminde syıaqy berildi.
Abaı ASANKELDIULY, «Egemen Qazaqstan»