Qazaqstan Prezıdenti TMD elderi basshylarynyń beıresmı sammıtine qatysty. Bul týraly akorda.kz habarlady.
Kezdesýge Ázerbaıjan Respýblıkasynyń Prezıdenti I.Álıev, Armenııa Respýblıkasynyń Prezıdenti S.Sargsıan, Belarýs Respýblıkasynyń Prezıdenti A.Lýkashenko, Qyrǵyz Respýblıkasynyń Prezıdenti S.Jeenbekov, Moldova Respýblıkasynyń Prezıdenti I.Dodon, Reseı Federasııasynyń Prezıdenti V.Pýtın, Tájikstan Respýblıkasynyń Prezıdenti E.Rahmon jáne О́zbekstan Respýblıkasynyń Prezıdenti Sh.Mırzııoev qatysty.
Memleketter basshylary jıyn barysynda Reseı Federasııasynyń TMD-ǵa 2017 jyly tóraǵalyq etýin qorytyndylady.
Nursultan Nazarbaev Vladımır Pýtındi TMD-ǵa tóraǵalyǵynyń tabysty aıaqtalýymen quttyqtap, Reseı Federasııasynyń Eýrazııalyq keńistiktegi ıntegrasııany damytý jáne Dostastyqtyń halyqaralyq bedelin nyǵaıtý úshin atqarǵan jumysynyń mańyzdylyǵyn atap ótti.
Memleket basshysy bıylǵy qarashada Mınsk qalasynda ótken Ujymdyq qaýipsizdik shart uıymynyń sammıtinde óńirlik jáne halyqaralyq kún tártibiniń meılinshe ózekti máseleleri qarastyrylǵanyn aıtty.
– Bizde kelissóz arqyly sheshe almaǵan másele joq. Bárimizge egemendik pen ózara qurmet qaǵıdattaryn negizge alyp, ári qaraı jumys isteý qajet, – dedi Qazaqstan Prezıdenti.
Nursultan Nazarbaev Vladımır Pýtınge aldaǵy Reseı Federasııasy Prezıdentiniń saılaýynda tabys tilep, Reseıdiń kópultty halqy durys sheshim qabyldaıtynyna senim bildirdi.
Sońynda taraptar túrli salalardaǵy memleketaralyq yntymaqtastyqty odan ári damytý máseleleri jóninde pikir almasyp, kelesi jyly TMD-ǵa tóraǵalyq etýine oraı Tájikstan Respýblıkasyna sáttilik tiledi.