Jalpy, memlekettik rámizderdi paıdalaný, qoldaný jáne jańa standarttaǵy Memlekettik Eltańbany ornalastyrý jaǵdaıynda búginde Jambyl oblysynda birqatar jónsizdikter oryn alyp otyr. Naqty aıtsaq, atalǵan máseleler boıynsha oblysta zerdeleý jumystary júrgizilip, jumys qorytyndysy oblys ákiminiń orynbasary Erqanat Manjýovtyń tóraǵalyǵymen ótken oblys ákimdigi janyndaǵy memlekettik rámizder jónindegi komıssııanyń otyrysynda belgili bolǵan edi.
Hamıt ESAMAN, «Egemen Qazaqstan»
Búginde óńirde 1537 memlekettik uıym bar. Al sonyń ishinde 252 mekemege zerdeleý jumystary júrgizilgen. Nátıjesinde, birqatar jónsizdikterdiń oryn alyp otyrǵanyn oblystyq ishki saıasat basqarmasynyń basshysy Ǵalııa Boranbaeva aıtty.
Sarysý aýdandyq ishki ister basqarmasy, Baızaq aýdany, Úlgili aýyldyq klýby jáne Jambyl aýdany Kólqaınar aýyldyq okrýgi ákimi apparatynyń ǵımaraty syrtynda ornatylǵan Memlekettik Tý jyrtylǵan bolsa, Sarysý aýdany, Saýdakent aýyldyq balalar saz mektebiniń, Jýaly aýdany, Qarasaz aýyldyq okrýgi ákimi apparatynyń, Shý aýdandyq ishki ister bóliminiń, Shý qalalyq emhanasynyń, Taraz qalalyq aýyl sharýashylyǵy bóliminiń basshylarynyń, sondaı-aq Shý aýdany, Qonaev aýyly ákiminiń kabınetterindegi Memlekettik Týǵa daq túsip, kirlegen.
Mundaı olqylyqtar oblystyń ózge de aýdandarynda jetip-artylady eken. Máselen, Talas aýdandyq ishki ister basqarmasynyń, Talas aýdandyq bilim bóliminiń, Qordaı aýdany boıynsha memlekettik kirister basqarmasynyń jáne Merki aýdany tótenshe jaǵdaılar bóliminiń ǵımarattarynda Memlekettik Eltańba múldem ornalastyrylmaǵan. Al Qordaı aýdandyq halyqty jumyspen qamtý ortalyǵynda, Moıynqum aýdandyq Jazylbek Qýanyshbaev atyndaǵy mýzeıde, Moıynqum aýdanyndaǵy №19 balalar-jasóspirimder sport mektebinde Memlekettik Tý ilinbegen. Sonymen qatar mundaı olqylyqtardy Taraz qalalyq turǵyn úı ınspeksııasy bólimi, Jýaly aýdandyq jer qatynastary bólimi, Jambyl oblysy boıynsha ekologııa departamenti, Sý resýrstaryn paıdalanýdy retteý jáne qorǵaý jónindegi Shý-Talas basseındik ınspeksııasy jáne Talas aýdandyq statıstıka basqarmasy sııaqty mekemelerden de kórýge bolady.
– Kirlegen Tý, aýyspaǵan Eltańba eldigimizge syn. Mundaıda amalsyzdan áttegen-aı deýge týra keledi. Aldaǵy ýaqyttarda jónsizdik joıylyp, aýdan, aýyl mekemelerinde rámizderge degen qurmet arta tússe, qanekeı!
Jambyl oblysy