2013 jyldyń 25 aqpanyna deıin Áýbákirovter áýleti el qatarly, ýaıym-qaıǵysyz tirshilik keship jatqan-dy.
Tórt balanyń kenjesi, 20 jastaǵy Perızat joǵary oqý ornyn bitirip, jumysqa ornalasyp, aǵylshyn tilin úırenip, bımen shuǵyldanyp, ánin salyp alańsyz júrgen bolatyn. Sol kúni ol aıaq astynan ystyǵy kóterilip, aýrýhanaǵa túsedi. «Aýrýhanaǵa túskennen keıin qoly men aıaǵy jansyzdanyp, kóziniń kórýi nasharlady. Dárigerler kópke deıin naqty dıagnoz qoıa almaı, aqyrynda optıkomıelıt (ortalyq nerv júıesiniń buzylýy) degen dıagnoz qoıdy. Dárigerlerge qaralyp, sál ońalǵandaı bolǵanda «bir aınaldyrsa shyr aınaldyrady» degendeı, 2015 jyly qysta Semeıge emhanaǵa kórinýge bara jatqanda kólik aýdarylyp, jaraqat almasa da múlde qozǵalyssyz qaldy. Qazir ol kúni-túni tósekte jatady, jaqynda aqyryndap oryndyqqa otyra bastady», - deıdi Perızattyń ápkesi Merýert.
Perızatqa Máskeýdegi emhanalardyń birinde dıagnostıka jasatyp, em alý úshin 4 mıllıon teńge qajet bolypty. Eki jarym mıllıon teńgeni jaqyn-jýyqtary men tanystary, basqa da janashyr jandardyń kómegimen áýpirimdep júrip jınapty. Qalǵan 1 jarym mıllıon teńgeni qaıdan tabamyz degende «Qazsınk» kompanııasy uıymdastyrǵan baıqaý týraly estip, qatysýǵa bel baılapty. «Uıaly telefondy utyp alsaq, satyp, aqshasyn Perızattyń emine jumsaımyz» dep uıǵarady. Alaıda uıymdastyrýshylar Áýbákirovter áýleti baıqaýda jeńimpaz bolsa da, bolmasa da 1 jarym mıllıon teńgeni kómek retinde berý jóninde sheshim qabyldaıdy. «Bizge «kelińizder» dep telefon shalǵanda ne senerimizdi, ne senbesimizdi bilmedik. Qýanyshymyzdy sózben jetkizý múmkin emes. «Qazsınk» kompanııasyna aıtar alǵysymyz sheksiz. Áke-sheshemiz de ań-tań. Bul qarjy Perızattyń densaýlyǵyn jaqsartýǵa septigin tıgizedi degen senimdemiz. Apaıym osy syrqattan jazylsam, erikti bolamyn deıdi. Onyń bul armany oryndalyp, aıaǵynan qaz turyp, qıyn jaǵdaıǵa tap bolǵandarǵa kómektesetin maman bolaryna sengimiz keledi», - deıdi baıqaýǵa qatysqan Perızattyń taǵy bir ápkesi Indıra Áýbákirova.
Azamat QASYM,
«Egemen Qazaqstan»
О́SKEMEN