Qazaqstan men Majarstannyń dıplomatııalyq qarym-qatynas ornatqanyna bıyl 25 jyl toldy.
Qos el búginde senimdi seriktes, myzǵymas dos, baýyrdaı tatý. Vengrler Qazaqstandy ózderiniń ata-jurty sanaıdy. XIII ǵasyrda 40 myń qypshaq mońǵoldardyń shapqynshylyǵynan osy Vengrııaǵa qonys aýdarǵan. Bertinde júrgizilgen genetıkalyq zertteýler majarlar men qazaqtardyń bir-birine bóten emes ekendigin dáleldedi. Qos tarap osy týystyqty, yntymaqty odan ári arttyrýǵa yntaly.
Biri Eýropanyń, ekinshisi Azııanyń altyn qaqpasyna aınalǵan qos eldiń taýar aınalymy qart qurlyqtaǵy daǵdarysqa qaramastan jyl ótken saıyn artyp keledi. Vengrııanyń bir ǵana «MOL» kompanııasy osy ýaqytqa deıin Batys Qazaqstan oblysyna 200 mln.dollar ınvestısııa quıdy. Jaqynda qurylǵan qazaq-vengr ınvestısııalyq qory endi Aqtóbe, Aqmola oblystarynda aýyl sharýashylyǵy jobalaryn qarjylandyrady. Majarlardyń kólik ınfraqurylymyn damytýdaǵy tájirıbesin ıgerý de bizge kóptik etpeıdi. Bul týraly «Qazaqstan» ulttyq arnasy habarlady.
Vengrııanyń geofızıkteri, IT mamandary da álemdegi eń úzdikterdiń qatarynda. Sol myqtylardy daıyndaıtyn joǵarǵy oqý oryndarynda qazir 200 qazaqstandyq stýdent Majar úkimetiniń grantyna tegin bilim alyp jatyr. Majar jastary arasynda da qazaq tilin úırenip, Qazaqstanda oqysam deýshiler kóp. Solardyń biri - Zoltan Hýstı.
Zoltan qazaqshaǵa ázir shorqaq. Endi úırenip júr. Esesine, dombyramen qazaqtyń kúılerin kúmbirletkende tańdaı qaqtyrmaı qoımaıdy.
- Men osy kúıdi tartyp, Almatyda ótken ónerpazdar baıqaýynda 3-shi oryndy ıemdendim. Qypshaq ekenimdi, qazaqtar baýyrym ekenin kishkentaıymnan sanama sińirip óskendikten, ata-babam sııaqty dombyrada oınaǵym keldi. Sóıtip, ǵalamtordan úırenýdi bastadym. Sosyn belgili ǵalym Ishtvan Qońyrdyń jary Ońǵaısha Mandokıdiń qoldaýymen Qazaqstanǵa baryp, kásibı mamandardan biraz sheberlik sabaǵyn aldym, - dedi majarlyq ónerpaz Zoltan Hýstı.
«Naǵyz qazaq - qazaq emes, naǵyz qazaq - dombyra» dep maqaldatqan Zoltan qazir Qurmanǵazy, Dına men Táttimbettiń 5-6 kúıin jatqa biledi. Astanadan sý jańa dombyrasy jetse, mekteptegi merekelik keshte óz ónerin kórsetedi. Qazaq tilin jetik meńgerip, shertpe kúıdiń sheberi bolsam deıtin oqýshy stýdenttik ómirin Qazaqstanda ótkizýdi kózdep otyr. Taǵy bir armany - tektik tutastyǵyn saqtap, baýyrlas halyqtardyń dostyǵyn nyǵaıtýǵa úles qosý.