Iolka Seıitbaıqyzy Pogranıchnık aýylyndaǵy Baýyrjan Momyshuly atyndaǵy mektepte muǵalim bolyp eńbek etedi.
Elimiz egemendigin alǵan sátte-aq, Ulanbatyrda turatyn Seıitbaı Kújkeı aǵamyz ben Kúlsaı Kóksegen apamyzdyń otbasy atamekenge qaraı asyǵys jınaldy. 1992 jyly eńbek sharty boıynsha elge qaraı bet túzegen kóshtiń ishinde alǵashqylardyń biri bolyp jetti. Baıanaýyldyń Júsipbek Aımaýytov atyndaǵy aýylyna qonystandy.
– Aımaýytovtyń aty sol kezden júrekke ornyqty. Kóshke rýh bergendeı. Ol kezde men 8 jasta edim. Kele sala qurylys bastap, ákem bastaǵan kósh 20 shaqty úı saldy. Osy úılerge bárimiz qonystandyq, – deıdi Iolka elge kelýin eske alyp.
Qazir Seıitbaı Kújkeıdiń úlken otbasy nemere, shóberelerimen Aqsý qalasy aýmaǵyna qarasty Pogranıchnık aýylynda turady. Kúlsaı apamyz «Altyn alqa» ıegeri. Oktıabr, Nurlan, Nurjan Erjan, Birjan, Iolka, Bekjan, Marta, Berikbol atty 9 bala tapqan ana. Barlyǵy da Ulanbatyr qalasynda dúnıege kelipti.
– 5 uldan keıin týǵan maǵan ákem Iolka degen esim beripti. Men 1983 jyly 29 jeltoqsanda jańajyldyq mereke qarsańynda Ulanbatyrda dúnıege keldim, – deıdi Iolka.
Bul kúnderi Iolkanyń aǵalary osy aýylda turady. Barlyǵy da temir jol boıynda eńbek etýde.
– Jeńgelerim muǵalimder. Inim Bekjan Aqsý qalasynda turady, zaýytta jumys isteıdi. Marqum Erjan aǵam jasóspirim kezinde Mońǵolııada qaıtys boldy. Kenje inim Berikbol qarashańyraqta ata-anammen birge. Ol da temirjolshy, kelinimiz balabaqshada qyzmette, – deıdi.
Iolka sińlimizdiń Ramazan, Shyńǵys, Kámshat atty úsh balasy ósip keledi. Ata-ájeleriniń ortasynda. Joldasym Ýlavhan Dáýletbek te temirjolshy. Ol da Mońǵolııanyń Tóv aımaǵynda 1983 jyly 15 qarashada dúnıege kelipti. 2006 jyly Iolkamen otbasyn qurǵan. Ýlavhan men Iolka 1-synyptan bastap birge oqyǵan eken. Partalastar dostyǵy mahabbat sezimine ulasqan.
– Bala kezimde esimimdi ózgertem dep armandaýshy edim, Shynar degen esim unaıtyn. Shynar da qasıetti aǵash qoı. Biraq óz atyma ábden úırenip kettim. Meniń áke-sheshemdi, otbasymdy jyl saıyn baqytqa, qýanyshqa jetkizetin, basqa adamdardy tańǵaldyratyn erekshe esimime qazir rızamyn, – deıdi ol.
Farıda BYQAI,
«Egemen Qazaqstan»
Pavlodar oblysy,
Aqsý qalasy,
Pogranıchnık aýyly
Sýrette: Iolka men Ýlavhan