Táýelsizdiktiń qadir-qasıetin halqymyz erteden bilgen. Bilgen soń babalarymyz qarys jer úshin syrtqy jaýmen alysyp ótti, qazaq dalasynda ımperııaǵa qarsy qanshama baskóterýler boldy. Danalarymyzdan «Egemen bolmaı, el bolmas» degen qaǵıda qaldy.
Adamnyń oı-sanasy tehnıkalyq progresti qaryshtatyp damytqan, ǵaryshty ıgere bastaǵan HH ǵasyrdyń ózinde basynda erkindigi joq halqymyz tilinen, dilinen aıyrylyp qala jazdady. Táýelsizdiktiń bolmaýynan jerimizdiń bútindigine qyzyl ımperııanyń kózin salǵan, «quda túsken» kezi boldy. Munyń barlyǵyn tarıh umytýǵa tıis emes.
1991 jyly elimiz Táýelsizdigin jarııalady. О́shkenimiz jandy, ólgenimiz tirildi. Halqymyz bostandyqtyń, erkindiktiń lebin sezindi. Bázbireýler úshin Táýelsizdik qantógissiz qolǵa ońaı kele salǵandaı bolady. Joq, olaı emes. «Myń ólip, myń tirilgen» qazaq ǵasyrlar boıy ómirin Táýelsizdik úshin kúrespen ótkizdi. Tarıh qan sýdaı aqqan iri shaıqastardy biledi. Táýelsizdikti alǵannan keıin ony tuǵyryn bekitýdiń mańyzy sol ǵasyrlar boıǵy kúresten kem túsken joq. Qol bastaý da, jol bastaý da, sóz bastaý da Táýelsiz eldiń Tuńǵysh Prezıdenti Nursultan Nazarbaevtyń ıyǵyna tústi.
Alda buryn álem bilmeıtin Qazaqstan degen eldiń, qazaq degen halyqtyń bar ekenin tanytý mindeti turdy. Ortaq bir qazanǵa qaraǵan ekonomıkalyq baılanystardyń úzilgen, josparly ekonomıkanyń ornyna naryq kelgen qysylshań ýaqyttarda tyǵyryqtan jol tabý kerek boldy. Osydan shırek ǵasyr ýaqyt burynǵy daǵdarǵan qıyndyqtardy búgingi aǵa urpaq ókilderi bastan keshti. Ekonomıkalyq daǵdarys qalany da, aýyldy da kúızeltken kúnderdi nege umytýymyz kerek? Sharýashylyqtardyń ydyraýy, soǵan oraı ishki kóshi-qonnyń údeýi, jumyssyzdyqtyń beleń alýy elimizge aýyr tıgen edi. Biraq Elbasy Nursulan Nazarbaevtyń syndarly saıasaty arqasynda halyqtyń rýhy túsken joq, ár júrekte Táýelsiz eldiń erteńi jaqsy bolaryna myǵym senim uıalady. Elbasy Nursultan Nazarbaevtyń «Táýelsizdik dáýiri» atty jańa kitabynda táýelsizdik jyldary onyń irgetasyn qalaýda atqarylǵan qadaý-qadaý, erkin eldiń erligine tán jumystardyń jylnamasy jasalady.
Jastar búgin jer júzi tanyǵan, alpaýyt memleketter sanasatyn, damyp otyrǵan elde erkin, eshqandaı jamandyq kórmeı ósip keledi. Olar tarıhty bilmeı Táýelsizdiktiń qadir-qasıetin de baǵalamaıdy. Sondyqtan Elbasynyń jańa kitabyn jastar oqýy tıis. Ol úshin joǵary, orta oqý oryndarynda fakýltatıvtik sabaq arqyly bolsa da kitap stýdentterge tanystyrylýy tıis. Bizdiń ınstıtýtta bul taqyrypta konferensııalar, jastardyń debattary, dóńgelek ústel otyrystary uıymdastyrylatyn bolady. Táýelsizdik jyldarynyń jylnamasyndaı kitap ár jasty alǵa talaptandyrady, oı-órisin ósiredi dep bilemin.
Abdrahman NAIZABEKOV, Rýdnyı ındýstrııalyq ınstıtýtynyń rektory, tehnıka ǵylymdarynyń doktory, professor
RÝDNYI