Parlement Senat depýtattary Mańǵystaý oblysyna jumys saparymen keldi. Oblys ákimi Eraly Toǵjanov Mıhaıl Bortnık, Baqtybaı Chelpekov jáne Dýlat Qýstavletovty qabyldady.
Kezdesý barysynda óńir basshysy depýtattardy oblystyń 2017 jylǵy áleýmettik-ekonomıkalyq damý nátıjelerimen tanystyrdy.
- 2017 jylǵy kórsetkish boıynsha Mańǵystaý oblysyndaǵy óndiris kólemi 100%-ǵa jetti. Investısııa ótken jylmen salystyrǵanda 82,2% -dan 104%-ǵa deıin ósti. Sondaı-aq, buryn josparlanǵan barlyq áleýmettik-ekonomıkalyq jobalar júzege asyryldy. Olardyń arasynda aldaǵy ýaqytta jalǵasyn tabatyn úlken jobalar da bar. Solardyń biri - «Nur Kapıtal». Kásipkerlerge 1%-ben nesıe beretin bul biregeı joba Elbasynyń qoldaýyna ıe boldy. Sonymen qatar, Quryq portynda 1 mln. 200 myń tonnadan astam júk tasymaldandy. Jylyna qosymsha 2 mln. tonna júk tasymaldaıtyn jańa avtokólik paromy paıdalanýǵa berildi», - dedi Eraly Toǵjanov.
Sondaı-aq, oblys ákimi Senat depýtattaryna otandyq týrızmdi damytý maqsatynda «Ata jol» jolyn qaıta jańartýdyń bastalǵanyn baıandap, bul rekonstrýksııa jumysy Mańǵystaý oblysy ákimdiginiń Qazaqstan Respýblıkasynyń Úkimeti qoldaýy aıasynda Investısııalar jáne damý mınıstrligimen yntymaqtasa otyryp atqarylatyn kóptegen jobalardyń biri ekenin atap ótti.
Qoshqar ata qaldyq qoımasyn qalpyna keltirý týraly depýtattardyń suraǵyna Eraly Toǵjanov osy maqsatta respýblıkalyq bıýdjetten 17 mlrd. teńgeden astam qarjy bólingenin aıtty.
- Qazir suıyq fazany turaqtandyrý úshin KOS-1-den 7,7 mıllıon tekshe metr tazartylǵan sý qaldyq qoımaǵa shyǵarylady. Budan basqa Basqudyq aýylynyń mıkroklımat, ekologııalyq jáne sanıtarlyq-gıgıenalyq jaǵdaıyn turaqtandyrý úshin jalpy aýdany 8,2 gektar bolatyn jasyl aımaqty qurý bastaldy. Sondaı-aq, uzyndyǵy 3 km bolatyn jasyl qorǵanys beldeýin qurý josparlanǵan», - dedi ol.
Gúlaıym ShYNTEMIRQYZY, «Egemen Qazaqstan»