Elbasy «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» dep atalatyn Qazaqstan halqyna arnalǵan bıylǵy Joldaýynda el damýyna qatysty eń negizgi 10 basymdyqty atady.
Solardyń qatarynda zań ústemdigine erekshe mańyz berildi. Men 30 jyldan astam sýdıalyq qyzmette bolǵan maman retinde Elbasynyń zań ústemdigine únemi nazar aýdarýynyń tórkinin jaqsy túsinemin. Biz 2030-2050 jyldarǵa strategııalyq damý josparyn quryp otyrǵan elmiz. Osy jyldar ishinde elimizdi eń damyǵan elder qatarynan kórgimiz keledi. Al oǵan qol jetkizý úshin zań ústemdigin ornatýdyń mańyzy zor. Olaı bolmaǵan elde – ekonomıkalyq damý bolmaıdy. Sottyń ádiletti ári táýelsiz bolýy, quqyq qorǵaý qyzmeti salasynyń neǵurlym ashyq, qyzmeti halyqqa qolaıly bolýy da basty másele.
Elbasy Joldaýda sot jáne quqyq qorǵaý júıelerin ınstıtýsıonaldy turǵydan ózgertý júzege asyrylyp jatqanyn, zańnamaǵa qylmystyq prosestegi azamattardyń quqyqtaryn qorǵaý isin kúsheıtýdi, onyń ásire qatańdyǵyn báseńdetýdi kózdeıtin normalar engizilgenin, advokattardyń quqyqtary men sotqa deıingi satydaǵy sot baqylaýynyń aıasy keńeıgenin, quqyq qorǵaý organdarynyń ókilettigi men jaýapkershilik shegi aıqyndalǵanyn aıta kelip, bolashaqta azamattardyń konstıtýsııalyq quqyqtaryna kepildikti nyǵaıtý, quqyq ústemdigin qamtamasyz etý, quqyq qorǵaý qyzmetin izgilendirý jumystaryn jalǵastyrý qajettiligin mindettep otyr.
Men Elbasy Joldaýyndaǵy qoǵamdyq tártipti saqtaý jáne qaýipsizdikti qamtamasyz etý salasynda kóshelerde jáne adam kóp jınalatyn qoǵamdyq oryndarda beınebaqylaý júrgizetin, azamattardy anyqtaıtyn jáne jol qozǵalysyn qadaǵalaıtyn ıntellektýaldy júıelerdi belsendi túrde engizý kerektigi týraly tapsyrmasyn búgingi kúnniń qajettiligi jáne ýaqyt tynysyn dóp basqan sheshim dep bilem. Olaı deıtinim, ótken aptada men birqatar áriptesterimmen Qyzylorda oblysynda bolyp, halyqpen júzdestim, pikirlerin tyńdadyq. Sapar barysynda jedel jáne aıqyn quqyqtyq qyzmet kórsetý maqsatynda qurylǵan Quqyq qorǵaý qyzmeti ortalyǵynyń jumysymen tanystyq. Azamattarǵa quqyqtyq máselelerdi sheshýde keshendi túrde kómek kórsetetin bilikti mamandar – prokýror, advokat, medıator, ákimdik ókilderi qyzmet etetin Ortalyq qazirgi zamanǵy ınjenerlik-tehnıkalyq quraldarmen jabdyqtalǵan. Kelýshilerge jaıly jaǵdaı jasalǵan.
Sondaı-aq qalada 500-ge jýyq kamera jumys isteıtin beınebaqylaý júıesimen tanystyq. Bul qurylǵylar qylmys deńgeıin tómendetýge úlken múmkindik berip otyr. Osy jańalyqty elimizdiń basqa da óńirlerine keńinen taratýdy usynǵan edik. Búgin týra osy, beınebaqylaý jáne basqa da ıntellektýaldyq júıelerdi engizý máselesi Joldaýda aıtylǵanyn kórip, Elbasynyń el tynysyn tereń sezinip otyrǵanyna kýá boldyq.
Biz osy ótken jyly jeltoqsan aıynda ǵana osy quqyqtyq qorǵaý organdarynyń qyzmetin jańǵyrtý týraly jańa zań qabyldadyq. Zańnyń maqsaty - árbir azamattyń - meıli ol aıyptalýshy, jábirlenýshi, kýá, shaǵymdanýshy bolsyn barynsha tıisti jaǵdaı jasaýekeni naqtylandy.
Bul jarııalanǵan Joldaý – bizdiń elimizdiń odan ári qaraı áleýmettik, ekonomıkalyq damýyna serpin beretin mańyzy zor Joldaý dep esepteımin. Parlament qabyldaǵan zańdary arqyly bul Joldaýdy júzege asyrýǵa eńbektenedi dep senemin.